Զինծառայողների համար յուրաքանչյուր աշխատողից ամսական 1000 դրամ պարտադիր վճար գանձելու փոխարեն ՀԱԿ խմբակցության պատգամավոր Հրանտ Բագրատյանն առաջարկել էր Կենտրոնական բանկի մեքենաները կրճատել. «31 մեքենա ի՞նչ են անում»:
Մենք ԿԲ նախագահ Արթուր Ջավադյանից հետաքրքրվեցինք, թե ի՞նչ են անում այդ 31 մեքենան: Նա պատասխանեց. «Բա մենք Ստեփանակերտում, Գորիսում, Սիսիանում, Դիլիջանում, Ծաղկաձորում ունենք կանխիկ դրամարկղային կենտրոններ, ունենք անվտանգության խնդիրներ, բա չունենա՞նք 31 մեքենա»:
Մեր դիտարկմանը, որ խնայողության տեղ չունե՞ք, չե՞ք ուզում կրճատել՝ նա պատասխանեց. «Խնայել ենք: Չենք ավելացրել: Էդ թիվը գիտե՞ք քանի տարի է արդեն»:
Ինչ վերաբերում է մեքենաների արժեքին՝ նա ասաց. «Շքե՞ղ: Մի հատ նայեք՝ էնտեղ շքեղ մեքենա կա՞»:
Կարդացեք նաև
Արթուր Ջավադյանն ասաց, որ իրենց բոլոր տիպի կապիտալ ծախսերը որեւէ ուղղակի կամ անուղղակի կապ բյուջեի հետ չունեն, եկամուտների, ծախսերի հետ, դա էմիսիա է. «Ուրիշ կառավարությունները խնդրում են, որ ԿԲ-ն ծախս իրականացնի, որ տնտեսական աճ ունենա, բայց, քանի որ Կենտրոնական բանկերը անկախ են՝ չեն կարող: Մենք, եթե մի բան անում ենք՝ դա հօգուտ մեր երկրի զարգացման: Բյուջեի հետ դա ոչ մի ազդեցություն չունի»:
Հռիփսիմե ՋԵԲԵՋՅԱՆ
