1976-1982թթ. Մոսկվայում Financial Times թերթի հատուկ թղթակից, 1982թ. The Wall Street Journal-ի՝ ԽՍՀՄ հարցերով փորձագետ, ներկայում Հադսոն համալսարանի ավագ գիտաշխատող, ԽՍՀՄ-ի և Ռուսաստանի հարցերով վերլուծաբան Դևիդ Սեթերը Aravot.am-ի հետ զրույցում համոզմունք հայտնեց, որ ապրիլին տեղի ունեցած քառօրյա պատերազմը նախաձեռնել էր Ադրբեջանը՝ տարածքներ գրավելու մտադրությամբ:
Պարոն Սեթերին հիշեցրինք մի առիթով ղարաբաղյան հակամարտության կարգավորման հարցի վերաբերյալ իր այն համոզմունքը, թե «վերադարձնելով օկուպացրած որոշ տարածքներ՝ Հայաստանը կկարգավորի ԼՂ հակամարտությունն ու կազատվի ռուսական ազդեցությունից»: Հետաքրքրվեցինք` ապրիլին տեղի ունեցած քառօրյա պատերազմից հետո և՞ս այդ կարծիքն ունի: Պարոն Սեթերը պատասխանեց. «Միանշանակ է այն, որ ապրիլյան պատերազմի նախաձեռնողը Ադրբեջանն էր: Նա ցանկություն ուներ ընդլայնել իր տարածքները: Սակայն Ղարաբաղյան հակամարտությունը Ռուսաստանի համար պատճառ է իր գերիշխանությունը տարածաշրջանում ավելի երկար ապահովելու համար: Ինչ վերաբերում է հակամարտության կարգավորմանը, բոլոր կողմերն էլ, բացի Ռուսաստանից, հետաքրքրված են դրա կարգավորմամբ, եթե, իհարկե, դա հնարավոր է»:
Պարոն Սեթերը ԱՄՆ նախագահ Դոնալդ Թրամփի ընտրության հետ որևէ նոր զարգացում ղարաբաղյան հակամարտության կարգավորման հարցում չի տեսնում: Ավելին, նա ցավով նշում է, որ ԱՄՆ-ն շարունակելու է իր նույն քաղաքականությունը, այսպես կոչված՝ «սառեցված հակամարտությունների» հարցով. «Սա լուրջ հակամարտություն է Հայաստանի և Ադրբեջանի համար, այն բազում կյանքեր է խլում: Բայց, ցավոք, այդ հակամարտությունը Ամերիկայի ուշադրության կենտրոնում չէ: Ուստի վստահ չեմ, որ նախագահ Թրամփի ընտրությունից հետո այս հարցում որևէ էական փոփոխություն կմտցվի»:
Նշենք, որ պարոն Սեթերը երեկ ԱՄՆ Կոնգրեսում հրավիրված քննարկմանը հանդես է եկել «Պուտինի վարչակարգի իրական բնութագիրը» թեմայով զեկույցով, որտեղ մի շարք փաստեր է ներկայացրել այն մասին, որ, օրինակ, ռուս-չեչենական պատերազմը, Բեսլանի ահաբեկչությունը կազմակերպել է հենց Պուտինի վարչակարգը:
Կարդացեք նաև
Դևիդ Սեթերի հետ ամբողջական հարցազրույցը կարդացեք վաղվա տպագիր «Առավոտ»-ում:
Տաթև ՀԱՐՈՒԹՅՈՒՆՅԱՆ
Լուսանկարը` Դևիդ Սեթերի ֆեյսբուքյան էջից
