«Պետք չէ վեց ամիս էլ պահել իշխանությունը, հիմա հրաժարական տվեք, որովհետեւ այն փաստաթուղթը, որը բերել եք, հրաժարականի մանիֆեստն է»,-խորհրդարանում 2017 թվականի բյուջեի նախագծի քննարկման ժամանակ ասաց ՀԱԿ խմբակցության ղեկավար Լեւոն Զուրաբյանը`դիմելով իշխանությանը: «Գնացեք, թող գան այն ուժերը, որոնք ունեն զարգացման ծրագիրը: Եթե ուզում եք իմանալ ո՞ր ուժն է`ՀԱԿ-ն է»,-ասաց նա: Նիստը նախագահող Հերմինե Նաղդալյանը զարմանքով ասաց. «Էլ ոչ մի արգումենտ չի մնացել, մնացել ա խնդրելը: Դուք հիմա աղերսում եք»:
ԲՀԿ նախագահ Նաիրա Զոհրաբյանն էլ նախ աչքալուսանք տվեց բոլորին, որ այս տարվա բյուջեով Զորի Բալայանին «ազգային տուրք» չենք վճարելու`Հայաստանում ծովագնացության ու նավատորմի զարգացման համար: «Կոռուպցիայի դեմ պայքարի հաղթարշավը տասը օր տեւեց: Տասն օրից ամեն ինչ վերադարձավ հին համակարգին`դա փաստում են եւ կաշառք տվողները եւ վերցնողները»,- շարունակեց Նաիրա Զոհրաբյանը: Նա կարծում է, որ ստվերի դեմ պայքարի համար կախարդական փայտիկ պետք չէ, ինչպես հայտարարում են կառավարությունների ղեկավարները, ընդամենը քաղաքական կամք է պետք: «Գլուխներդ դալաններից բարձրացրեք տեսեք, թե վերեւներում ինչ է կատարվում»,- խորհուրդ տվեց ԲՀԿ նախագահը`նկատի ունենալով դատավորին՝ գետնանցումում կաշառք վերցնելու համար կալանավորելու հայտնի դեպքը:
ՕԵԿ նախագահ Հեղինե Բիշարյանը հայտարարեց, որ իրենք «դեմ» են քվեարկելու նախագծին: «Դեմ» կքվեարկեն նաեւ ՀԱԿ-ն ու ԲՀԿ-ն: ՀՀԿ-ն եւ ՀՅԴ-ն «կողմ» կքվեարկեն:
Կարդացեք նաև
Նելլի ԳՐԻԳՈՐՅԱՆ
