«Ինչպես ասում են մեզ մոտ, տանգո պարելու համար զույգ է պետք: Վստահորեն կարող եմ ասել, որ Հայաստանն ու ՆԱՏՕ-ն հիանալի զույգ են՝ տանգոյի համար», – այսօր Երեւանի ՆԱՏՕ-ի Տեղեկատվական կենտրոնում ասուլիսի ժամանակ ասաց ՆԱՏՕ-ի գլխավոր քարտուղարի օգնական Ջեյմի Շին:
Պարոն Շիի խոսքով, Հայաստանի լավ հարաբերությունները ՌԴ-ի հետ չպետք է խանգարեն ՆԱՏՕ-ի հետ ունեցած հարաբերություններին. «Հայաստանին իմ ուղերձը ոչ թե «կամ-կամ» է, այլ` «եւ -եւ»։ Հայաստանը չի ուզում դառնալ ՆԱՏՕ-ի անդամ ու ամենեւին էլ պարտադիր չէ անդամ լինել ՝ համագործակցության բազմաթիվ ծրագրերից օգտվելու համար»: ՆԱՏՕ-ի գլխավոր քարտուղարի օգնականը նաեւ ասաց, որ ՆԱՏՕ-ն հարգում է Ռուսաստանի հետ բարիդրացիական հարաբերություններ պահպանելու՝ Հայաստանի ընտրությունը, ինչպես նաեւ ԵՏՄ-ին ու ՀԱՊԿ-ին անդամակցությունը։
Անդրադառնալով ՀՀ-ՆԱՏՕ համագործակցությանը՝ պարոն Շին նկատեց, որ անհատական գործընկերության գործողությունների ծրագրի շրջանակում հատուկ ուշադրություն է պետք ոչ միայն զորքերի փոխհամատեղելիության, այլեւ կիբերանվտանգության վրա: Նրա խոսքով, մի քանի հայկական ստորաբաժանումներ արդեն իսկ հավաստագրված են եւ համապատասխանում են ՆԱՏՕ-ի բարձրագույն ստանդարտներին:
Արփինե ՍԻՄՈՆՅԱՆ
