ՀԱԿ խմբակցության քարտուղար Արամ Մանուկյանն այսօր ԱԺ-ում 2017-ի բյուջեի նախագծի քննարկման ժամանակ ասաց, որ ունենք պաշտոնապես 40 տոկոսանոց ստվեր, որից հարկային դաշտ բերելու հետ կապված բյուջեի նախագծում խոսք չկա. «Տարիներ շարունակ այս դահլիճում մեզ համոզել են, որ ՀՆԱ-արտաքին պարտքի ցուցանիշը 50 տոկոսը չի անցնելու, վերահսկելի է եւ այլն: Առաջին անգամ այսօր հայտարարեցիք, որ 50 տոկոսն անցել է եւ 2 տոկոս էլ ավելանալու է»:
Արամ Մանուկյանի տեղեկություններով՝ շուրջ կես միլիարդ էլ արտաքին պարտքն այս տարի է ավելանալու:
Ֆինանսների նախարար Վարդան Արամյանը պատասխանեց, որ աշխարհում երկիր չգիտի, որ 1 տարվա ընթացքում 40 տոկոսանոց ստվերը բերել է բյուջե ամբողջութամբ: Նա ասաց, որ եթե ագրեսիվ գործողություններ կատարեն եւ տնտեսվարողների կանխիկ հոսքերի մեջ խեղումներ մտցնեն՝ տնտեսական աճի վրա է ազդելու:
Ինչ վերաբերում է արտաքին պարտքին, նախարարն ասաց, որ պետական պարտք- ՀՆԱ անվանական ցուցանիշներով մենք կունենանք 5 մլրդ 849 մլն դրամ: Նախարարն ասաց, որ 2017-ին, համենայնդեպս, շոկ չեն ակնկալում, տնտեսական հետագա անկում չեն ակնկալում, որովհետեւ նախորդ տարիներին վերցրած պարտքերով հակազդել են շոկերին:
Կարդացեք նաև
Նախարարն ասաց, որ Հայաստանը գնահատվում է նվազ պարտքի բեռ ունեցող երկիր: Մենք այն տիրույթում չենք, որ խիստ վտանգավոր պարտքի բեռ ունենք:
ՀԱԿ խմբակցության ղեկավար Լեւոն Զուրաբյանը նույնպես արտաքին պարտքի մասին հետաքրքրվեց: Նախարարը պատասխանեց, որ 2017-ին ակնկալում են, որ արտաքին պարտքը կլինի 6 մլրդ 245 մլն դոլար:
Հռիփսիմե ՋԵԲԵՋՅԱՆ
