Բելառուսի նախագահ Ալեքսանդր Լուկաշենկոն հայտարարել է, որ Եվրասիական տնտեսական միությունում «քիչ չեն խնդիրները», և մտավախություն է հայտնել, որ կարող է սկսվել ապաինտեգրման գործընթաց, գրում է «ՌԻԱ Նովոստին»:
«Մեր Եվրասիական տնտեսական միությունում 30-40 տոկոսով ապրանքաշրջանառության նվազումն արդեն ինքնին ամեն ինչ ասում է: Նշանակում է՝ այստեղ մեր խնդիրները քիչ չեն, և այդ մասին խոսում են բոլոր նախագահները… Առաջիկայում, եթե մենք չմշակենք այս իրավիճակից դուրս գալու կանոնավոր ծրագիր, վախենամ, որ կսկսվի որոշակի ապաինտեգրում, ինչը ոչ մի դեպքում չի կարելի թույլ տալ»,- ասել է Լուկաշենկոն Մինսկում տեղի ունեցած մամուլի ասուլիսում:
Լուկաշենկոն նաև հարցադրում է կատարել՝ արդյոք գոհ են ԵԱՏՄ նոր անդամները, հատկապես Ղրղըզստանը: «Ես նրանց միանգամայն հասկանում եմ և շատ հարցերում պաշտպանում եմ՝ որ եթե մենք ընդունել ենք նրանց միություն, ապա պետք է հավասար իրավունքներ տալ: Ստացվում է, որ նրանք մեկ չեն կարող տավարի միս մատակարարել Ղազախստան, մեկ անասունը տեղափոխել, մեկ էլի ինչ-որ խնդիրներ են առաջ գալիս: Այդ դեպքում հարց է առաջանում. ինչու՞ ենք ընդունել՝ իմանալով, որ խնդիրներ են լինելու: Իրավական քայլը կատարել ենք, իսկ փաստացի սկսում ենք արգելակել Եվրասիական տնտեսական միության հետ այդ պետությունների համագործակցությունը… Քիչ չեն խնդիրները նաև «ծերերի»՝ Ռուսաստանի, Բելառուսի ու Ղազախստանի մոտ»,- ասել է Լուկաշենկոն:
Նա նշել է, որ ոչ մի դեպքում չի կարելի թույլատրել «առևտրային պատերազմներ»: «Մեզ մոտ դեռ շատ սպիտակ հետքեր կան, որոնք պետք է լցնել, բայց մեր պետությունների մոտ տարբեր շահերի առկայության պատճառով երկար ժամանակ դա չի հաջողվում»,- ասել է Բելառուսի նախագահը:
Կարդացեք նաև
Միաժամանակ, նա նշել է, որ այդ խնդիրները «աղետալի բնույթ» չեն կրում, և ցանկության դեպքում դրանք հնարավոր է հաղթահարել:
Պատրաստեց՝ Վիկտորյա ԱՆԴՐԵԱՍՅԱՆԸ
