Այսօր ԱԺ-ում լրագրողների հետ զրույցում Գրիգորի Մարգարյանը՝ Բելաջիոյի Գրիշը, խոսելով զինծառայողների համար յուրաքանչյուր աշխատողից 1000 դրամ պարտադիր վճարի նախագծի մասին՝ ասաց. «Չեմ կարծում, որ այդ 1000 դրամը մեծ գումար է: Ժողովուրդը հաճույքով կվճարի, որովհետեւ վճարում է իր զինվորի համար: Եվ այստեղ փորփրել, ընկնել սենսացիաների հետեւից, թե գողացած գումարը տան: Էդ գողացած գումարը թողնենք մի կողմ, զոհված ազատամարտիկը զոհված ազատամարտիկ է»:
Նա ասաց, որ ինքը կոնկրետ երկու ձեռքով կողմ է, որ գողացված գումարները հետ տան. «Ով ուզում է, թող բերի: Դրա համար համապատասխան մարմիններ կան: Պատգամավորը չի բերելու էդ գումարը»:
Գրիգորի Մարգարյանը հիշեցրեց, որ իրենց աշխատավարձերից բանակի համար արդեն պահում են 6000 դրամ: Դա նախաձեռնվեց ապրիլյան պատերազմից հետո: Ըստ նրա, թալանված գումարը կապ չունի սահմանի վրա արյուն թափող զինվորի հետ. «Նա այնտեղ չի մտածում թալանված փողն ինչ եղավ»:
Հարկ է սա, տուրք է թե ինչ է՝ Գրիգորի Մարգարյանի խոսքերով՝ անունն ինչ ուզում եք դրեք. «Լավ, ասեք հոգու պարտք է, պարտավորվածություն է, մեր զինվորի պարտքն ենք մենք տալիս: Նա սահմանի վրա իր պարտքը տալիս է արյունով, մենք էլ որոշել ենք 1000 դրամով տալ»:
Կարդացեք նաև
ՀՀԿ-ական Սամվել Ալեքսանյանն էլ լրագրողներին ասաց, որ բանակին միշտ օգնել է ու կօգնի՝ առանց դրա մասին հայտարարելու. «Մի տեղ լսած կա՞ք, որ ում ինչ արել եմ՝ ասել եմ»:
Նա հորդորեց լրագրողներին թալանելու, գողանալու, թալանը հետ բերելու հետ կապված հարցեր իրեն չտալ. «Ինձ էդ ձեւ հարցեր մի տվեք, ես էդ հարցերի մեջ չկամ»:
Իսկ երբ լրագրողներն ասացին, որ ձեր անունն էլ է կապվում մենաշնորհների անօրինական դաշտի հետ՝ Սամվել Ալեքսանյանը թեման փակեց. «Վերջացրու, արդեն ուրիշ կռուգի մեջ մտար»:
Հռիփսիմե ՋԵԲԵՋՅԱՆ
