Երևանի ու Բաքվի միջև անհրաժեշտ է ստեղծել «թեժ գիծ»՝ Լեռնային Ղարաբաղում տեղի ունեցող իրադարձություններին օպերատիվ արձագանքելու համար: Նման հայտարարություն է արել Հայաստանի նախագահ Սերժ Սարգսյանը «ՌԻԱ Նովոստիին» տված հարցազրույցում:
«Կարելի է, եթե դա օգուտ տա, եթե մենք օպերատիվ արձագանքենք իրադարձություններին: Ենթադրենք, շփման գծում ինչ-որ մեկը կրակում է, և, ըստ մեր տվյալների, կրակողն ադրբեջանցիներն են, ես վերցնում եմ խոսափողը, զանգահարում Ադրբեջանի նախագահին և ասում՝ կրակում են: Եվ նա ստուգում է դա»,- ասել է Սարգսյանը Դմիտրի Կիսելյովին տված հարցազրույցում:
Նախագահը նշել է, որ ինքը «դեմ չէր լինի» Երևանի և Բաքվի միջև նման «թեժ գիծ» բացելու տարբերակին:
«Ես պատրաստ կլինեի վերահսկողություն սահմանել և ասել՝ մերոնք կրակում են, թե չեն կրակում, իհարկե, ակնկալելով նույնպիսի վերաբերմունք Ադրբեջանի ղեկավարի կողմից»,- ասել է նա:
Կարդացեք նաև
Սերժ Սարգսյանը հիշեցրել է, որ 1990-ականներին նման «թեժ գիծ» բացելու փորձ արվել է: «Նման փորձ մեզ մոտ արվել է 1990-ականների սկզբին, այդ ժամանակ ես Հայաստանի պաշտպանության նախարարն էի, մենք ուղիղ կապ ունեինք Ադրբեջանի պաշտպանության նախարարության հետ: Նման էքստրեմալ իրավիճակներում, երբ արտահերթ կապի կարիք էր լինում, մենք կարող էինք կապվել: Բայց այժմ նման բան չկա»,- մեկնաբանել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
