«Ժառանգության» պատգամավոր Զարուհի Փոստանջյանն այսօր ԱԺ-կառավարություն հարցուպատասխանի ժամանակ հարց ուղղեց այն ժամկետային զինծառայողի մասին, որը հիմա գտնվում է Արմավիր քրեակատարողական հիմնարկում:
Նա ասաց, որ 2015-ին այդ տղան դատապարտվել է 1 տարի 6 ամիս ազատազրկման, երբ բանակում ձեռք է բերել առաջին կարգի հաշմանդամություն: Փոխանակ ՊՆ-ն երիտասարդին ուղարկի բուժման, հարցին լուծում չի տվել, եւ տղան ծայրահեղ միջոցի է դիմել՝ ուշադրություն հրավիրելու: Նա կեղծ ահազանգել է, թե Բաղրամյան 26-ում ռումբ է տեղադրված:
Զարուհի Փոստանջյանն ասաց, որ նրա ընտանիքը գտնվում է սոցիալապես ծանր վիճակում եւ հորդորեց արդար լինել, նրա հարցին տալ շտապ լուծում:
ՊՆ նախարար Վիգեն Սարգսյանը պատասխանեց, որ խնդրին ծանոթ են. «Հանցագործությունը կրել է պարբերական եւ կրկնվող բնույթ, այսինքն, ոչ թե մեկ զանգ է եղել, այլ՝ կրկնվող զանգեր, թե ռումբ է տեղադրված տարբեր տեղերում»:
Կարդացեք նաև
Նախարարն ասաց, որ մի քանի անգամ զգուշացվել է նրան, եւ այն պատիժը, որն ի վերջո սահմանվել է, համապատասխան է նրա կատարած հանցագործությանը: Ինչ վերաբերում է նրա բուժմանը, նախարարը վստահեցրեց, որ բոլոր հնարավոր միջոցները ձեռնարկվել են, այն ժամանակ ՊՆ նախարարը խոսք է տվել, որ արտերկիր բուժման կուղարկի, մինչդեռ այդ միջոցները բյուջեով նախատեսված չեն եղել:
Վիգեն Սարգսյանն ասաց, որ ծրագրել է այցելել այդ տղային կալանավայր:
Զարուհի Փոստանջյանն արձագանքեց, որ նախարարը ճիշտ է, տղան մի քանի անգամ է զանգել, բայց ԱԺ դահլիճում էլ կան պատգամավորներ, որոնք բռնության կոչեր են անում, եւ նրանք ավելի վտանգավոր են, քան առաջին կարգի հաշմանդամը, բայց նրանց ոչ մեկը չի տանում, հարցաքննում:
Հռիփսիմե ՋԵԲԵՋՅԱՆ
