Երևանի ավագանու անդամ Անահիտ Բախշյանը «Մարտիկ» հիմնադրամի վերաբերյալ տարբեր մարմիններին ուղարկած հարցումների արդյունքում պարզել է, որ 2014-ին թերի հաշվետվության համար հիմնադրամի տնօրենը արդարադատության նախարարության կողմից նկատողություն է ստացել:
Այս օրերին հատկապես «1000 դրամի» օրենսդրական նախաձեռնության շուրջ սկսված քննարկումների շրջանակում ամենից շատ քննարկվում է, թե հիմնադրամի գումարներն ինչի վրա են ծախսվել:
Տիկին Բախշյանի ձեռքի տակ են հայտնվել հիմնադրամի ծախսերի հաշվետվությունները, թեեւ նա խորությամբ ուսումնասիրել է դրանք, բայց իրեն ու բոլորին հուզող հարցի վերաբերյալ հստակություն չի տեսել:
«2015 թվականին մոտ 82 միլիոն դրամ է ծախսվել կանոնադրական նպատակներով, բայց գրված չէ՝ ինչ նպատակներ են, կոնկրետ ինչի վրա են ծախսել: Գրված է նաեւ՝ սպայական կազմի ուսուցում արտասահմանում: Հարց եմ ուղղել՝ քանի սպա է գնացել վերապատրաստման, պատասխան չկա, բանակի համար ինչ եք արել՝ ոչ մի պատասխան: Դրա համար անվստահություն կա նմանատիպ ֆոնդերի նկատմամբ»,- այսօր «Հայելի» ակումբում ասաց տիկին Բախշյանը:
Կարդացեք նաև
ԱԺ ՀՀԿ-ական պատգամավոր Սուքիաս Ավետիսյանն էլ խորհուրդ տվեց «1000 դրամների» նախագիծը չկապել «Մարտիկ» հիմնադրամի գործունեության հետ, ապա նկատեց, որ ճիշտ չեն նաեւ տարբերակումները, թե շատ աշխատավարձ ստացողը ավելի շատ պետք է վճարի.
«Իզուր են ասում՝ շատ ունեցողը թող շատ տա, քիչ ունեցողը չտա կամ քիչ տա: Այս հազար դրամը չպետք է կապ ունենա մարդու գրպանի պարունակության հետ, այլ լինի յուրաքանչյուրի վերաբերմունքը բանակի նկատմամբ եւ լինի հավասար»:
Անահիտ Բախշյանն էլ շարունակեց, թե հատկապես ապրիլյան պատերազմից հետո իշխանությունները տեսան բանակի խնդիրները: Նա նաեւ պատմեց, որ երբ հուլիսին Արցախի կառավարության հրավերով՝ մեկնեց Արցախ, այցելեց սահման, միայն մի բան էր լսում՝ ինչ որ չի արվել այս 20 տարիների ընթացքում, արվեց 5 ամսվա ընթացքում. «Բա ո՞ւր էիք այդ 20 տարին, ինչո՞ւ ոչինչ չէր արվում»:
Արփինե ՍԻՄՈՆՅԱՆ
