«Նրան միշտ ուրախ ենք հիշում, նա մեր հետ է»,-ասում է Արցախի հերոս Ռոբերտ Աբաջյանի հայրը՝ Ալեքսանդր Աբաջյանը: Ապրիլյան ռազմական գործողությունների ընթացքում հերոսաբար զոհված Ռոբերտը՝ «Մոնումենտցի Կյաժը», այսօր կդառնար 20 տարեկան:
«Ես 42 տարեկան, նա՝ 18, նա ընկեր էր…բոլոր հերոսներին փառք»,-Աբաջյանների տանը լրագրողների հետ զրույցում ասաց Ալեքսանդր Աբաջյանը:
Կարդացեք նաև
«Միասին Երեւանից գնում էինք Ռուսաստան: Դռան բակից մինչեւ Վորոնեժ՝ այ ստեղս հասցրեց…դրանք երանելի երկու օրեր էին: Անհնար էր նրա հետ քայլել ու բերանը մինչեւ ականջները չբացել: Կյանքով լի էր՝ ոչ մի բառ ման չէր գալիս, բառերը գրպանում լիքն էին: «Կյաժն» ուրիշ էր…»,-հիշեց Աբաջյանների հարազատներից Էդգար Վարոսյանը:
Հերոսի մայրը՝ Աննա Աբաջյանն էլ նշեց՝ Ռոբերտն այնքան էր սիրում իր ծննդյան օրը, որ համապատասխան թվերով հեռախոսահամար էր վերցրել՝ 161196. «Միշտ 12-ից 5 պակաս էր զանգում, բոլորի ծնունդը շնորհավորում, որ առաջինն ինքը լիներ…այնքան ուրախ մարդ էր, որ հնարավոր չէր նրա կողքը տխուր նստել: Այնպես էր անում, որ բոլորին ուրախացնի…Ուղղակի Ղարաբաղը…ուզում էի՝ Ղարաբաղ չգնա: Ասում էր՝ «մամ, կտեսնես, ես Ղարաբաղ եմ ընկնելու, ես բախտ չունեմ»…չուներ էլի բախտ…»:
Լուիզա ՍՈՒՔԻԱՍՅԱՆ
