Նոյեմբերի 16-ին «Հենարան» ակումբում Երևանի պետական տիկնիկային թատրոնի գեղարվեստական ղեկավար Ռուբեն Բաբայանը եւ «Հայաստանի փոքրիկ երգիչներ» երգչախմբի գեղարվեստական ղեկավար և դիրիժոր Տիգրան Հեքեքյանն անդրադարձան «ՀՀ պաշտպանության ժամանակ զինծառայողների առողջությանը կամ կյանքի վնասի փոխհատուցման մասին» օրինագծին, ըստ որի՝ 2017 թ. հունվարի 1-ից յուրաքանչյուր աշխատող ֆիզիկական անձից ամսական 1000 դրամ է գանձվելու:
Ի թիվս այլոց, Ռուբեն Բաբայանը եւս նոյեմբերի 14-ին ներկա է գտնվել ՊՆ կողմից հրավիրված խնդրի վերաբերյալ հանրային քննարկմանը: Արվեստագետն ասուլիսում նշեց, որ գաղափարն ընդունելի է համարում, սակայն նա եւս այն համոզման է, որ կամավորության սկզբունքով պետք է ամեն ինչ արվի, քանի որ վստահության դեֆիցիտ կա:
Ռուբեն Բաբայանի խոսքով, «Մարդը պիտի հաճույք ստանա, պիտի իր համար հաճելի լինի, որ օգնում է իր բանակին ու երկրին… Ինչո՞ւ չեն հավատում, որ մենք ինքներս էլ կցանկանանք օգնել ինքնակամ: Մտավախություն կա, թե այս գումարը չի՞ հավաքվի… Եթե այդպես պատահի, այդ պարագայում թող պարտադիր դարձնեն»:
Նրա ձեւակերպմամբ, պատերազմում հաղթել ենք հենց կամավորների շնորհիվ, ու հասարակությունն այսօր ընդվզել է, քանի որ նրա սուրբ պարտականությունը դարձնում են պարտադիր:
Կարդացեք նաև
Գոհար ՀԱԿՈԲՅԱՆ
