Նոյեմբերի 16-ին «Հենարան» ակումբում հյուրընկալված էին Երևանի պետական տիկնիկային թատրոնի գեղարվեստական ղեկավար Ռուբեն Բաբայանը եւ «Հայաստանի փոքրիկ երգիչներ» երգչախմբի գեղարվեստական ղեկավար և դիրիժոր Տիգրան Հեքեքյանը:
Ասուլիսում քննարկվեց «ՀՀ պաշտպանության ժամանակ զինծառայողների առողջությանը կամ կյանքի վնասի փոխհատուցման մասին» օրինագիծը, ըստ որի՝ 2017 թ. հունվարի 1-ից յուրաքանչյուր աշխատող ֆիզիկական անձի կողմից ամսական 1000 դրամ է գանձվելու: Իմիջիայլոց, երկու գործիչներն էլ նոյեմբերի 14-ին ներկա են գտնվել ՊՆ կողմից հրավիրված խնդրի շուրջ հանրային քննարկմանը:
Տիգրան Հեքեքյանն ասուլիսում ասաց, որ ցանկացած հայ, անգամ թոշակառու տատիկը կցանկանա իր խնայած գումարից հատկացնել հայ զինվորին, բայց դա պետք է անել կամավոր սկզբունքով: Տիգրան Հեքեքյանը նաեւ կարեւորեց վստահության մթնոլորտի ստեղծումը, ասելով, որ ժողովրդի զգալի հատվածը չի վստահում այդ գործընթացն իրականացնողների ազնվությանը:
«Մարդիկ մտածում են, որ այդ փողի առյուծի բաժինն իշխանություններին է հասնելու…Տարիներ շարունակ՝ իշխանությունները կոտրել են ժողովրդի հավատը: Հասկանում եմ, որ պետք չէ բոլոր գեներալներին վիրավորել, բայց կան, չէ՞, այնպիսիք, որոնք յուրացրել են այն, ինչը բանակին է պատկանել: Այս մասին բոլորը գիտեն՝ հայ մշակից մինչև իշխանության ներկայացուցիչ…Ու երբ ասում են՝ պարտադիր պիտի լինի, դրա համար էլ ժողովուրդը ընդվզում է, բայց բանակը մերն է ու մենք պաշտում ենք մեր զինվորներին: Ժողովուրդն իրականում կողմ է այդ նախագծին, ուղղակի դրա ձևին է դեմ: Թող ամեն ինչ բաց անեն, որ մուտքերն ու ելքերը երևան, որ դռները բաց լինեն, ժողովուրդը վստահի այս գործընթացին: Ու պարտադիր բառը դուրս մղվի», – ասաց Տիգրան Հեքեքյանը:
Կարդացեք նաև
Նա նաեւ անդրադարձավ բանակի օրը նշելու եւ այլ տոնական առիթներով ծախսվող մեծ գումարներին ու կոչ արեց տոներն ավելի համեստ նշել:
Գոհար ՀԱԿՈԲՅԱՆ
