ԱԺ-ում զինծառայողների համար յուրաքանչյուր աշխատողից 1000 դրամ պարտադիր վճարի նախագծի քննարկումները շարունակվում են:
«Ժառանգություն» խմբակցության պատգամավոր Ռուբեն Հակոբյանի խոսքերով՝ այս երկու օրը կարծես ԱԺ-ում բանակասիրության չեմպիոնատ է անցկացվում, եւ առաջին տեղին հավակնորդները անողոք են՝ քննադատությունների նկատմամբ: Ռուբեն Հակոբյանն ասաց, որ չի կասկածում որեւէ մեկի հայրենասիրությանը, բանակասիրությանը, բայց ուժեղ բանակ ունենալու համար պետք է այնպիսի մեխանիզմներ ստեղծվեն, որ բանակը զերծ կպահեն մտահոգություններից:
Նա Իսրայելի օրինակը բերեց, որտեղ բանակում յուրացումների նկատմամբ ծանրագույն պատիժ է սահմանվում, որովհետեւ բանակում յուրացումը սրբապղծություն է. «Պատերազմի մեջ գտնվող երկրի բանակում յուրացումը նշանակում է մոռանալ բոլոր սրբությունները»:
Ըստ նրա, ով քննադատում է բանակի թերությունները, ցեխ չի շպրտում, ով փորձում է չտեսնել այդ սխալները, հենց նա է ցեխ շպրտում, այնպես որ, պետք չի «չեմպիոնատում խաղեր տալ»:
Կարդացեք նաև
Ռուբեն Հակոբյանն ասաց, որ Սեյրան Սարոյանը հետաքրքիր վերջաբան է դրել իր ելույթին. «Երբ լրագրողները հարցնում են՝ անուններ կտա՞ք բանակում չարաշահում թույլտվածների, ասում է՝ սկի դատախազը ռիսկ չի անում էդ անունները տալ, ես ո՞նց տամ: Վերջակետ: Սա ճշգրիտ պատասխանն էր»:
Ռուբեն Հակոբյանն անդրադարձավ իր հեղինակած նախագծին՝ տարկետումը հանելու եւ 18 տարեկան բոլոր տղաներին բանակ տանելու մասին: Նա ասաց, որ ազգ-բանակ գաղափարը միայն ամբիոններից չպետք է հնչեցնել. «Պետք է բոլոր մեխանիզմներն օգտագործել, որ դա լինի»: Ինչ վերաբերում է 1000 դրամներին, Ռուբեն Հակոբյանն ասաց, որ մինչեւ 100 հազար դրամ աշխատավարձ ստացողներից չպետք է գանձվի, կամ կամավորության սկզբունքով լինի, 150-250 հազար դրամ աշխատավարձ ստացողներից գանձվի 1000 դրամ, այնուհետեւ՝ 500 հազար աշխատավարձ ստացողից՝ 2000 հազար դրամ, 750 հազար դրամ ստացողից՝ 3000, 1 մլն դրամ ստացողն էլ չի զլանա 4000 դրամ տալ:
Հռիփսիմե ՋԵԲԵՋՅԱՆ
