«Նախաբեմ» կրթամշակութային ասոցիացիան աշնանային արձակուրդի օրերին, այս տարի՝ հոկտեմբերի 31-ից նոյեմբերի 5-ը, 16-րդ անգամ անցկացրեց «Նռան հատիկ» հանրապետական մանկական թատերական փառատոնը:
«Առավոտի» հետ զրույցում դերասան, ռեժիսոր, ասոցիացիայի նախագահ Գարիկ Ղազարյանը հիշեցրեց, որ «Նռան հատիկի» պատվավոր նախագահն է Արման Մանարյանը, իսկ նպատակը նույնն է՝ դպրոցական տարիքից երեխաներին հայ եւ համաշխարհային գրականության լավագույն նմուշներին ծանոթացնելը՝ հենց իրենց հասակակիցների միջոցով: Մեր զրուցակիցը հավաստիացրեց, որ այսօր արդեն կարող են փաստել, որ փառատոնային օրերին ներկայացումներով հանդես են եկել մանկական թատերական խմբեր Հայաստանի բոլոր մարզերից եւ Արցախից, ներկայացնելով Թումանյանից, Շիրվանզադեից, Սարոյանից մինչեւ Օստրովսկի, Օ’Հենրի, Անդերսեն եւ այլ դասական հեղինակներ, ինչպես նաեւ ժամանակակից գրողների երկեր:
Գարիկ Ղազարյանը՝ փոքրիկ արտիստների հետ:
Պարոն Ղազարյանը նշեց նաեւ, թե «Նախաբեմի» գերնպատակը յուրաքանչյուր դպրոցում թատերախմբի գործունեությունն է եւ թատրոն առարկայի դասավանդումը: Հավելեց նաեւ, թե, օրինակ, Շիրակացու անվան ճեմարանի հիմնադրման օրվանից (26 տարի առաջ) ուսուցանվում է դրամատուրգիա առարկան: «Հեռավոր գյուղերում, որտեղ անգամ բեմ չկա, երեխաները դասարաններում են անցկացնում բեմադրությունների փորձերը, օրինակ՝ Արագածոտնի մարզի Սաղմոսավան համայնքի դպրոցում, եւ այլն: Օրերս կայացած փառատոնին մասնակից դպրոցների աշխարհագրությունն ընդլայնվել էր: Փառատոնի մշտական մասնակիցների թվում են «Հույսի կամուրջ», «Փրկություն» հ/կ-ների հաշմանդամություն ունեցող երեխաների թատերախմբերը»,- հայտնեց մեր զրուցակիցը: Հավելեց նաեւ, թե իրենց ասոցիացիայի մասնագետները տարվա սկզբից են մեկնում հեռավոր մարզեր, ընտրում փառատոնի մասնակից խմբերին, իսկ հարկ լինելու դեպքում՝ օգնում մասնագիտական խորհուրդներով:
Հարցին, թե նախորդ տարիներին «Նռան հատիկին» մասնակցել են նաեւ թատերախմբեր Փարիզից, Բեյրութից, Թեհրանից, Պլովդիվից, մի խոսքով՝ այս տարի մենք չհանդիպեցինք արտասահմանից ժամանած գոնե մեկ խմբի, պարոն Ղազարյանը պատասխանեց. «Նռան հատիկին» երկու տարին մեկ է ֆինանսավորում մշակույթի նախարարությունը: Հաջորդ տարի արդեն կհրավիրենք արտասահմանից մեր փոքրիկ դերասաններին»:
Հետաքրքրությանը՝ իսկ ընդհանրապես մանկական այս մասշտաբային ծրագիրն ունի՞ հովանավորներ, ասոցիացիայի նախագահը բացասական պատասխան տվեց, նշեց միայն, որ իրենց ձեռք են մեկնում Ավ. Իսահակյանի անվան հանրապետական կենտրոնական գրադարանը, Շիրակացի ճեմարանը, իսկ Երեւանի քաղաքապետարանն էլ կազմակերպում է դպրոցներում տոմսերի անվճար տարածում:
Մենք ներկա գտնվեցինք մեկ-երկու մանկական ներկայացումների, այդ թվում՝ Ա. Տիգրանյանի անվան երաժշտական դպրոցում Հովհ. Թումանյանի «Անբան Հուռին» եւ «Քաջ Նազարը» ու Շիրակացի կրթահամալիրում Օստրովսկու «Ամպրոպը» եւ Շուշիի Խանդամիրյանի անվան թատրոնի՝ Վ. Սարոյանի «Հայ մուկը» ներկայացումներին: Փաստենք, որ ավարտին փոքրիկ արտիստների ու դպրոցահասակ հանդիսատեսի միջեւ ծավալվում էր իսկապես բուռն քննարկում:
Իմիջիայլոց, դեռեւս 1980-ականների կեսերին Մխիթար Սեբաստացի կրթահամալիրում ռեժիսոր Լեւոն Իվանյանի ջանքերով ներդրվել է պարտադիր թատերական կրթություն՝ շաբաթական 2 դասաժամով: 1990-ականներին թիվ 190 դպրոցի ուսումնական ծրագրում, այժմ կառավարության աշխատակազմի ղեկավար-նախարար Դավիթ Հարությունյանի տնօրինության շրջանում ներգրավվեց թատրոն առարկայի դասավանդումը: Ավելի ուշ՝ 2010-ի սկզբներից, Սեբաստացի կրթահամալիրում սկսեց գործել կինոյի եւ թատրոնի մասնագիտական հոսքը:
ՍԱՄՎԵԼ ԴԱՆԻԵԼՅԱՆ
«Առավոտ»
15.11.2016
