Նոյեմբերի 15-ին «Մենք» մամուլի ակումբի հյուրերն էին դիզայներ Արամ Նիկոլյանը և ոճաբան- բլոգեր Սիրարփի Ադամյանը: Հայաստանյան նորաձևության ոլորտը նոր է սկսում ճանաչվել աշխարհում, որը հարևան Վրաստանում մոտ 10 տարի առաջ էր սկսվել:
Բլոգեր- ոճաբան Սիրարփի Ադամյանը նշեց. «Բոլորս էլ գիտենք, որ դժվար է Հայաստանում ապրել, առավել ևս ստեղծագործել ինչ որ բան, որովհետև բազմաթիվ խնդիրներ կան թե՛ տնտեսական, թե՛ հնարավորությունների առումով: Ճիշտ է, հայտնվում են երիտասարդ դիզայներներ, սակայն պետք է նշել, որ այս ոլորտում աշխատելու կամ ստեղծագործելու համար առաջնայինը կրթությունն ու տեղեկացվածությունն է, որը շատերի մոտ բացակայում է կամ թերի է: Մեր ազգը ստեղծագործ է, սակայն դա քիչ է, պետք է նաև բազա»:
Արամ Նիկոլյանի ձեւակերպմամբ, Հայաստանը չունի այն որակյալ երիտասարդությունը, որը կարող է հետևել իրենց և դա հիմնականում կրթության պակասից է. «Որպես այդպիսին կրթական համակարգը շատ է կաղում: Նորաձևությունը ժամանակի հետ շատ արագ քայլող մասնագիտություն է, իսկ մեր բուհերում շարունակում են դասավանդել սովետական հիմքերով անհասկանալի ծրագրեր, որի արդյունքում, միգուցե, մենք չենք ունենում լավ կադրեր:
Մյուս խնդիրը մեր հիմիկվա սերնդի մի քիչ այդքան ոչ նպատակասլաց ու ծույլ լինելն է, սակայն կան երիտասարդներ, որոնք բավականին հաջող են, հետաքրքիր մտածելակերպ ունեն, ուղղակի իրենք շատ քիչ են:
Մյուս խնդիրը մեր արյան մեջ է, յուրաքանչյուրը փորձում է լիդեր լինել, երիտասարդները երբևիցե չեն ուզում գան ինչ որ տեղ կայացած դիզայների մոտ պրակտիկայի, կամ եթե գալիս են` ասում են, որ այդ դիզայների հաջողությունը կապված էր իրենց ներկայությունից:
Նորաձևության ոլորտը ոչ միայն դիզայներն է, դիզայների հետ աշխատում են դերձակներ, ձևարարներ, տեխնոլոգներ և այլք, դա խմբակային աշխատանք է: Նորաձևությունը նաև բիզնես է, դիզայները չի կարող և՛ստեղծագործել և՛ այլ հարցերով զբաղվել, դրա համար, իհարկե, անհրաժեշտ են տվյալ ոլորտի մասնագետներ: Հայաստանում այդ հարակից մասնագիտությունները, որոնք նորաձևությունը հրում են առաջ, բիզնեսի առումով, չկան, չկան նաև կրթօջախներ, որոնք թողարկում են նման մասնագետներ: Նորաձևության ոլորտում պետական ոչ մի աջակցություն չկա, սակայն այս ոլորտի առավելությունն այն է, որ մոնոպոլիզացված չէ»:
Վերջին հարցի վերաբերյալ Արամ Նիկոլյանը նշեց. «Միգուցե երիտասարդ դիզայներներին թվա, որ այդ հինգ-վեց հոգին մոնոպոլիզացրել են այս ոլորտը և չեն թողնում այս ոլորտում նոր անունների ի հայտ գալը, բայց ես չեմ կարծում, որ դա իրականություն է, այսինքն, հաստատ չեմ համեմատի շաքարի կամ կարագի բիզնեսի հետ»:
Արթուր ՏԻՐԱՑՈՒՅԱՆ
