«Զինվոր» համակարգող խորհրդի նախագահ Մարգարիտա Խաչատրյանը, ի թիվս շատ շատերի, բացասական կարծիք ունի, այսպես կոչված, «բանակի հարկի» վերաբերյալ։ Նա առավել մտահոգիչ է համարում այդ «հարկատեսակի» բարոյահոգեբանական կողմը եւ կարծում է, որ դա ահազանգ է այն մասին, որ բանակում հետայսու նույնպես լինելու են զոհեր ու վիրավորներ, որոնց աջակցելու համար էլ պիտի ամեն ամիս ազգովի «փող քցվենք»։
«Տա Աստված, որ 2017 թվից հետո այլեւս ոչ մի զոհ չունենանք, ոչ մի զինվոր թող չվիրավորվի, թող չհաշմվի։ Եվ բերեք նման հիմնադրամներով չծաղրենք մեր զոհվածների ընտանիքներին, չթիրախավորենք նրանց, որոնք, Աստված մի արասցե, 2017-ի հունվարի 1-ից սկսած պիտի կորուստ ունենան՝ զինվոր կամ զինծառայող կորցնեն կամ վիրավոր զինվոր ունենան։ Մեր՝ հատկապես որդեկորույս մայրերիս անունը շահարկելը, ժողովրդի հայրենասիրական զգացմունքների հետ խաղ անելը, մեղմ ասած, մեզ պատիվ չի բերում,- ասաց Խաչատրյանը՝ հավելելով։- Խոսքն այդ 1000 դրամի՝ գումարի քանակի մասին չէ։ Մենք նախապես չպետք է պատրաստենք բանակում զինվոր ունեցող ընտանիքներին, թե՝ տեսեք, մարդիկ հազար դրամներ են տալիս, եւ եթե դուք ձեր մինուճար տղաներին կորցնեք, պետությունը ձեր կորուստը փողով կհատուցի կամ սատար կկանգնի ձեր հաշմանդամ որդուն։ Զոհվածների անունները տարատեսակ գումարային հարցերում շահարկելն ավելացնում է որդեկորույս մայրերիս սրտի մրմուռը, որը ոչ մի գումարով փարատել հնարավոր չէ»:
Հեղինե ՄԱՆՈՒԿՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
