Հայկական զինված ուժերում կանանց ներգրավվածությունը 7-12% է: Նրանք հիմնականում ներգրավված են վարչական, բժշկական, թիկունքային պաշտոններում, ինչն աշխարհում ընդունված փորձ է: Այս մասին նոյեմբերի 14-ին «Կանայք զինված ուժերում» խորագրով քննարկման ժամանակ լրագրողներին հայտնեց ՀՀ ՊՆ մարդու իրավունքների եւ բարեվարքության կենտրոնի պետ, փոխգնդապետ Ալիկ Ավետիսյանը:
Նա տեղեկացրեց, որ նախարարությունը մի շարք հետազոտություններ է իրականացրել՝ պարզելու, թե կանայք ինչպե՞ս են վերաբերվում բանակում ծառայելու գաղափարին. «Արդյունքները հակասական են, թեեւ գաղափարը շատերի համար ընդունելի է: Հասարակության շրջանում տրամադրվածությունը դրական է: Ընդ որում, մենք չենք դիտարկում պարտադիր ժամկետային զինծառայությունը: Մեզանում խնդիր չի դրված «ֆեմինիզացնել» բանակը: Մեր խնդիրն է՝ մարդու իրավունքների տեսանկյունից ապահովել կանանց ներգրավվածությունը»:
Ալիկ Ավետիսյանը նշեց, որ կանանց արդեն կարող են ներգրավել մարտական ծառայության մեջ. «Մենք ունենք հատուկ ծառայություններում ներգրավված կանայք, որոնք բավականին հաջող են ծառայում»:
Լուիզա ՍՈՒՔԻԱՍՅԱՆ
