Նոյեմբերի 13-ին UWC Դիլիջան քոլեջում հանդիպում տեղի ունեցավ հայտնի գրող Նարինե Աբգարյանի հետ։ UWC Դիլիջան քոլեջի եւ Դիլիջանի համայնքային կենտրոնի նախաձեռնությամբ կազմակերպված գրական երեկոյին ներկա էր շուրջ 200 մարդ՝ քոլեջի ուսանողները, Դիլիջանի, Վանաձորի եւ գրողի հայրենի քաղաք Բերդի բնակիչները։
UWC Դիլիջան քոլեջի տնօրեն Դենիս Դեւիդսոնը, ողջունելով Նարինե Աբգարյանին, պատմեց, որ ուսանողները գրադարանում հեղինակի գրքերի ընթերցանություն կազմակերպելով՝ հատուկ պատրաստվել էին նրա հետ հանդիպմանը․
«Գրականությունը մեր կյանքի մեծ մասն է։ Այն կարող է ուրախացնել մեզ տխուր օրերին, կարող է ստիպել ծիծաղել այն ժամանակ, երբ դժբախտ ենք, կարող է ստիպել մեզ մտածել այն մասին, թե ով ենք մենք, այն կարող է ապաստանել մեզ այն աշխարհից, ուր չենք ուզում ներկա լինել։ Ես հասկացա, որ Ձեր գրքերն այդ ամենը տալիս են ընթերցողին»,-նշում է Քոլեջի տնօրենը։
Հանդիպման մասնակիցները Նարինե Աբգարյանին նրա արվեստի, Հայաստանում եւ Ռուսաստանում անցկացրած կյանքի, ստեղծագործությունների բեմականացման եւ հնարավոր էկրանավորման, ինչպես նաեւ դրանց թարգմանության եւ համացանցային տարածման մասին շատ հարցեր տվեցին։ Գրողը երիտասարդ հեղինակներին «ուրիշների խորհուրդները չլսելու, այլ սեփական կարծիքին ապավինելու» խորհուրդ տվեց։ Քոլեջի բազմազգ լսարանին ուրախացրեց այն նորությունը, որ առաջիկայում Նարինե Աբգարյանի գրքերն անգլերեն կթարգմանվեն, այդպիսով ուսանողներն ավելի լավ կծանոթանան Հայաստանին, նրա պատմությանն ու ազգային ոգուն, քանի որ առաջիկա երկու տարին նրանք հենց այստեղ են ապրելու։
Կարդացեք նաև
Նարինե Աբգարյանը UWC Դիլիջան էր այցելել վերջինիս համահիմնադիր Վերոնիկա Զոնաբենդի հրավերով․
«Այժմ աշխարհում ընդհանուր արժեքների եւ առօրյայից ու քաղաքականությունից զատ ապագայի շուրջ մշակութային, ինտելեկտուալ երկխոսության պակաս կա։ Քոլեջի միջազգային միջավայրը ինտելեկտուալ հաղորդակցություն է սնում, եւ Նարինեի հետ հանդիպումը նման, հոգեւոր զարգացումը խթանող զրույցներից է»,-կարծում է Վերոնիկա Զոնաբենդը։
Նարինե Աբգարյանը, ով առաջին անգամ չէր UWC Դիլիջան քոլեջում, ասում է, որ այս դպրոցն ապագայի մի մասն է․
«Այս դպրոցում ձեւավորվում են այնպիսի մարդիկ, որոնք կփոխեն ապագան։ Նրանք այն սերմերն են, որոնք ճիշտ պտուղ են տալիս»,-նշում է գրողը։
Մամլո հաղորդագրություն
