«Այն արտահայտությունները, որ վերագրվում են ինձ, իրականությունից բավականին հեռու են: Նման արտահայտություն հասարակության կամ ժողովրդի հետ կապված, երբեւէ չեմ արել, չեմ մտածել եւ երբեւէ չեմ անելու»,- խորհրդարանում լրագրողների հետ զրույցում ասաց ՀՀԿ խմբակցության քարտուղար Գագիկ Մելիքյանը:
Հիշեցնենք, Yerkir.am-ին տված հարցազրույցում Գագիկ Մելիքյանն ասել էր. «Ֆեյսբուքյան գրառումները հասարակության կարծիքը չեն արտահայտում: Իրականում, պետք չէ հասարակության անունից խոսել, եթե այդ հասարակությունը 50 հոգի է: Պետք չէ մի քանի տականքների անունից գրված նման գրառումներին պատասխան տալ»:
«Նույնիսկ նման մտածողությունն ինձ համար անընդունելի է: Ես հանրության կամ ժողովրդի հետ կապված նման արտահայտություն չեմ արել: Ֆեյսբուքյան մի խումբ անձանց մասին իմ արտահայտությունը չի վերաբերում ժողովրդին»,- շարունակեց ՀՀԿ-ական պատգամավորը`հավելելով, որ ֆեյսբուքում իրոք 1000 դրամների մասին նախագծի հետ կապված «ապազգային, հակապետական, հակաազգային, հակահայկական, Արցախի եւ երկրի անվտանգությանը դեմ» հայտարարություններ արվել են, իր արտահայտություններն էլ վերաբերել են նման արտահայտություններ անողներին:
«Խնդրում եմ դա երբեւէ չկապել հանրության կամ ժողովրդի հետ: Նրանք հանրության մաս են, բայց հանրություն չեն: Եթե հանրության մեջ նման ընկալում է ձեւավորվել, ես պատրաստ եմ ներողություն խնդրել: Սակայն իմ խոսքը ժողովրդին կամ հանրությանը չի վերաբերվել»,- ասաց Գագիկ Մելիքյանը`հավելելով, որ իր հարցազրույցի եւ դրա վերնագրի տարընթերցման մեջ միտում է տեսնում:
Կարդացեք նաև
Լրագրողն, ի դեպ, պնդեց, որ ինքը ձայնագրություն ունի եւ պարոն Մելիքյանն ասել է ճիշտ այնպես, ինչպես հարցազրույցում գրված է:
Հրապարակումներ եղան, որ Գագիկ Մելիքյանի հայտարարությունից հետո ՀՀԿ անդամ Արմեն Պապյանը հայտարարել է, որ հեռանում է ՀՀԿ-ից: Գագիկ Մելիքյանը պնդեց, որ նրան չի ճանաչում: ՀՀԿ-ում էլ փորձում են գտնել` նա կուսակցության անդա՞մ է, թե՞ ոչ, բայց դեռ չեն պարզել:
Նելլի ԳՐԻԳՈՐՅԱՆ
