Christian Times Newspaper պարբերականը տեղեկություն է հրապարակել, որ ԱՄՆ նախագահական ընտրություններում պարտություն կրած Հիլարի Քլինթոնը բաժանվում է ամուսնուց՝ Բիլ Քլինթոնից: Տեղեկությունը զանգվածաբար տարածվել է ռուսական առաջատար լրատվամիջոցների կողմից, այնուամենայնիվ, որևէ հավաստի աղբյուրից չի հաստատվել:
Հրապարակման մեջ նշվում է, որ Հիլարիի փաստաբանները ապահարզանի վերաբերյալ փաստաթղթեր են ներկայացրել Նյու Յորք նահանգի գերագույն դատարան:
Որպես ամուսնալուծության պատճառ նշվում են «անհաշտ տարաձայնությունները»: Ըստ պարբերականի՝ Քլինթոնների միջև կա առանձին ապրելու համաձայնագիր, բացի այդ, նրանք պայմանավորվածություն ունեն համատեղ ձեռք բերված գույքի բաժանման վերաբերյալ: Պարբերականը գրում է, որ Քլինթոններին արդեն վաղուց կապում են միայն գործնական հարաբերությունները, և այժմ՝ Հիլարիի պարտությունից հետո, նրանք կարող են պաշտոնապես բաժանվել:
Տեղեկատվությունը չեն մեկնաբանել ո՛չ Քլինթոնները, ո՛չ էլ նրանց մոտ շրջապատից որևէ մեկը: Այլ լրատվամիջոցներում նման հրապարակում չկա: Ուշագրավ է, որ ԱՄՆ նախագահական ընտրություններում Հիլարի Քլինթոնի պարտությունից մի քանի օր անց Նյու Յորքի բնակիչները նրան նկատել էին ամուսնու հետ անտառում զբոսնելիս:
Կարդացեք նաև
Christian Times Newspaper պարբերականը բացվել է 2015թ. դեկտեմբերին, այն հավաստի աղբյուրների շարքում չէ, ավելին, նախկինում աչքի է ընկել կեղծ նորությունների հրապարակմամբ հենց Հիլարի Քլինթոնի մասին:
Պատրաստեց՝ Վիկտորյա ԱՆԴՐԵԱՍՅԱՆԸ
