Ազգային ժողովի «Ժառանգություն» խմբակցության պատգամավոր Զարուհի Փոստանջյանը գրությամբ դիմել էր առողջապահության նախարար Լեւոն Ալթունյանին, Մարդու իրավունքների պաշտպան Արման Թաթոյանին, արդարադատության նախարար Արփինե Հովհաննիսյանին «Սասնա ծռեր» խմբավորման անդամ Հովհաննես Հարությունյանին վիրահատելու վերաբերյալ:
Պատգամավորը պատասխան է ստացել Լեւոն Ալթունյանից եւ Արման Թաթոյանից: Առողջապահության նախարարը նշել է, որ Հովհաննես Հարությունյանի ներկա վիճակը գնահատելու եւ բուժման հետագա գործառույթը հստակեցնելու նպատակով կազմակերպվել է կոնսիլիում առողջապահության նախարարության գլխավոր եւ առաջատար վնասվածքաբանների մասնակցությամբ. «Մասնագիտական եզրակացության համաձայն Հովհաննես Հարությունյանը ներկա պահին վիրահատական բուժման ցուցումներ չունի: Տրվել են խորհուրդներ, նշանակվել է դեղորայքային եւ վերականգնողական բուժում, ինչը հնարավոր է կազմակերպել ՀՀ արդարադատության նախարարության «Դատապարտյալների հիվանդանոց» քրեակատարողական հիմնարկում»:
Կարդացեք նաև
Իսկ ՄԻՊ-ի պատասխանում նշված է. «Հովհաննես Հարությունյանի բժշկական փաստաթղթերի ուսումնասիրության եւ բուժման ուղղիչ հիմնարկի պետի բուժական գծով տեղակալի հետ զրույցի արդյունքում պարզվել է, որ 2016 թվականի սեպտեմբերի 8-ին Հ. Հարությունյանը պլանային կարգով տեղափոխվել է «Էրեբունի» բժշկական կենտրոն, որտեղ կատարվել են անհրաժեշտ հետազոտություններ: Բժշկական կոնսիլիումը որոշել է շարունակել կոնսերվատիվ բուժումը՝ ծնկահոդի պահիչով (ֆիքսատոր) անշարժացումը եւս 4 շաբաթ՝ հաշվի առնելով ոսկրաբեկորների բավարար դիրքը եւ սերտաճման աստիճանը: 2016 թվականի սեպտեմբերի 12-ին Հ. Հարությունյանը դուրս է գրվել «Էրեբունի» բժշկական կենտրոնից եւ տեղափոխվել «Դատապարտյալների հիվանդանոց» քրեակատարողական հիմնարկ:
2016 թվականի հոկտեմբերի 6-ին կատարած կրկնակի ռենտգենոգրաֆիկ հետազոտության արդյունքների զննությամբ «Էրեբունի» բժշկական կենտրոնի վնասվածքաբան Գ. Բդոյանը առաջարկել է շարունակել դինամիկ հսկողությունը: Նախատեսվում է «Էրեբունի» բժշկական կենտրոնի կողմից ռեաբիլիտոլոգի խորհրդատվություն:
Մարդու իրավունքների պաշտպանի աշխատակազմի աշխատակիցների հետ տեղի ունեցած առանձնազրույցի ժամանակ Հովհաննես Հարությունյանը հայտնել է, որ ոտքի շրջանում ունի ցավեր եւ չի կարողանում հենվել ոտքի վրա եւ մեկ այլ բժշկի խորհրդատվությամբ ցուցվել է եւս մեկ վիրահատական միջամտության անհրաժեշտություն: Պաշտպանի ներկայացուցիչների կողմից իրականացված ուսումնասիրության ժամանակ Հ. Հարությունյանի փաստաթղթերի շարքում նման փաստաթուղթ առկա չի եղել»:
Ամի ՉԻՉԱԿՅԱՆ
