«Հայաստանի կառավարության ներկայացրած ծրագրից առաջին անգամ ծրագրի հոտ է գալիս»,- նոյեմբերի 12-ին «Տեսակետ» մամուլի ակումբում լրագրողների հետ հանդիպման ընթացքում ասաց կառավարման փորձագետ Հարություն Մեսրոբյանը:
Սակայն, նա հավելեց, որ դա չի կարելի ընկալել որպես լիակատար ծրագիր. «Եթե մենք մի փաստաթղթի անունը դնում ենք ծրագիր՝ կապ չունի, թե կառավարության ծրագիր է, կորպորացիայի, ինքը պետք է ունենա պարտադիր բաղադրիչներ: Բաղադրիչներից մեկն այն է, որ պետք է գրված լինի, թե ինչ ենք ուզում անել, տվյալ դեպքում, խոսքը կառավարության մասին է՝ ինչ պետություն ենք ուզում կառուցել: Երկրորդը՝ ինչ գլխավոր թիրախներ կան, որպեսզի այդ նպատակը ստացվի: Երրորդը՝ ինչ քայլեր են պետք, որը բաժանված կլինի պարբերականությունով, այսինքն՝ երեք ամիսը մեկ, վեց ամիսը մեկ կամ տարին մեկ ինչ կարեւորագույն ցուցանիշներ պետությունը պետք է ապահովի: Այդ ցուցանիշները պետք է լինեն ե՛ւ քանակական, ե՛ւ այնտեղ, որտեղ չի կարող լինել քանակական ցուցանիշ պետք է լինի որակական»:
Հարություն Մեսրոբյանը նշեց նաեւ, որ կառավարության ծրագրում կան նաեւ դրական կետեր. «Վերջապես ինչ-որ կոնկրետ միջոցառումներ են գրված, ինչ-որ կոնկրետ ժամկետներ են դրված, ինչ-որ նոր գաղափարներ կան: Եվ ընդհանրապես զգացվում է, որ միայն բաժակաճառեր չեն, չնայած այդ ծրագիրն ունի որոշ չափով նախկին բոլոր բաժակաճառային ծրագրերի շորշոփ, բայց նաեւ ունի դրական մասեր»:
Ամի ՉԻՉԱԿՅԱՆ
Կարդացեք նաև
