«Միասնություն, սերնդափոխություն, հաղթանակ». այս կարգախոսով այսօր հայաստանյան քաղաքական դաշտում իր մուտքն ազդարարեց «Միասնություն» շարժումը: Այսօր կայացած շարժման առաջին համաժողովում, համակարգող խմբի անդամ, ԲՀԿ նախկին խոսնակ Խաչիկ Գալստյանը հայտարարեց, որ այս շարժումը դառնալու է Հայաստանի իրականության ամենասպասված իրողություններից մեկը, քանզի երկում կուտակվել են բազում խնդիրներ`սոցիալական, տնտեսական, իշխանություն-հասարակություն անջրպետը, տարբեր հասարակական հարցերի կուտակումը օր-օրի լուծում են պահանջում:
Ուստի «Միասնության» անդամները նպատակադրվել են ապահովել բնականոն սերնդափոխություն, առողջ մրցակցային դաշտի ստեղծում, հայրենասեր անհատների, կարող եւ ինտելեկտուալ ուժերի համախմբում, պետական կառավարման փիլիսոփայության փոփոխություն, համազգային միասնության հաստատում:
Կարդացեք նաև
«Այս շարժումը լինելու է մեր սերնդի միասնության, համերաշխության եւ հաղթանակի շարժումը»,- հայտարարեց Խաչիկ Գալստյանը:
«Միասնությունում» իրենց նպատակներին հասնելու հետեւյալ ճանապարհն են տեսնում` հանրային հարթակներում գաղափարական քննարկումների իրականացում եւ նոր մոտեցումների գեներացիա: Այդ նպատակի համար շարժման դռները բաց են բոլոր այն մարդկանց եւ ուժերի համար, ովքեր պատրաստ են նման համագործակցության:
Նելլի ԳՐԻԳՈՐՅԱՆ
