Ցանկացած կնոջ հմայքի անբաժանելի մասն է կազմում հարթ եւ առողջ մաշկը: Մաշկի վրա առաջացող զոլերը թեպետ անցավ են եւ չեն առաջացնում առողջական խնդիրներ, սակայն էսթետիկ տեսանկյունից որոշակի անհարմարությունների պատճառ են դառնում: Բժիշները խորհուրդ են տալիս նրանց դեմ պայքարել կոսմետիկ պատրաստուկներով ու ավանդական միջոցներով եւ զերծ մնալ վիրաբուժական միջամտություններից:
Doctors.am-ը ներկայացնում է տնային պայմաններում մաշկի վրա առաջացող զոլերից ազատվելու միջոցներ: Մաշկի հարթ, թարմ եւ առողջ տեսքը պայմանավորող նախապայմաններից է ճիշտ սննդակարգը: Բանջարեղենը, մրգերը, ընկույզը, բուսական յուղը, ծովամթերքները պարունակում են վիտամիններ եւ միկրոտարրեր, որոնք անհրաժեշտ են մաշկի առողջության համար: Խորհուրդ է տրվում օրվա ընթացքում օգտագործել նաեւ մեծ քանակությամբ հեղուկ:
Տեղային օգտագործման համար արդյունավետ են ձիթապտղի, նշի, կիտրոնի, նարինջի եւ ցորենից պատրաստված յուղերը: Ճարպոտ մաշկի դեպքում նախապատվությունը տրվում է նշի յուղին, իսկ չոր մաշկի դեպքում` նշի յուղի համակցումը ցորենից պատրաստված յուղի հետ: Այս յուղերին ավելացնում են վիտամին E ու տարբեր արոմատիզատորներ եւ քսում են զոլեր ունեցող մաշկին: Արդյունավետ է նաեւ մերսումը: Մերսումը հանգեցնում է նյութափոխանակության պրոցեսների ակտիվացմանը եւ լավացնում է մաշկի տվյալ հատվածի արյունամատակարարումը, ինչն իր հերթին նպաստում է նորմալ կենսագործունեությանը:
Կարող են լինել տարբեր միջոցների համակցումներ, օրինակ՝ մերսումից հետո քսել յուղեր եւ ծածկել: Տնային պայմաններում կարելի է նաեւ պատրաստել տարբեր քսուքներ:
Այդպիսի քսուքի պատրաստման համար անհրաժեշտ է.
– կես բաժակ ալոեի հյութ,
– կես բաժակ ձիթապտղի յուղ,
– 10 կաթիլ վիտամին E,
– 5 կաթիլ վիտամին A:
Տվյալ քսուքն օգտագործում են օրը 3 անգամ, որը պետք է պահել սառնարանում:
«Առավոտ»
11.11.2016
