Գերմանիայի տրանսատլանտյան Atlantikbrücke կազմակերպության նախագահ Ֆրիդրիխ Մերցը կարծում է, որ ԱՄՆ-ում Դոնալդ Թրամփի իշխանության գալով, Եվրոպան, թերևս, ստիպված կլինի նոր քաղաքական կուրս մշակել Ռուսաստանի նկատմամբ, որում դիմակայություն չի լինի: Այս մասին նա ասել է գերմանական Die Welt պարբերականի հետ զրույցում:
«Համաշխարհային թատերաբեմում, ի դեմս Թրամփի և Պուտինի, հանդես կգան երկու մարդ, որոնք ակնհայտ համակրանք են տածում միմյանց նկատմամբ,- ասել է Մերցը:- Եվ նրանց օրոք ԱՄՆ-ի և Ռուսաստանի միջև այսօրվա լռությանը, ամենայն հավանականությամբ, կարող է վերջ տրվել»:
Արդյոք դա տեղի կունենա Եվրոպայի հաշվին՝ վերլուծաբանը կարծում է, որ դա կախված է Եվրամիության վարքից: «Եվրոպան պետք է պատրաստ լինի, որ ինքը պետք է ԱՄՆ-ի հետ սերտ համագործակցությամբ մասնակցի Ռուսաստանի նկատմամբ նոր քաղաքականության մշակմանը, որը վերջ կդնի այսօրվա դիմակայությանը: Այլապես ԵՄ-ը կմնա կողմնակի դիտորդի դերում»,- վստահ է Մերցը:
Բացի այդ, նա կարծում է, որ Թրամփը Եվրոպայից շատ ավելին կպահանջի, քան ԱՄՆ մյուս նախագահները: «Մասնավորապես, նա կցանկանա իմանալ՝ էլ ինչ է պատրաստ անել Եվրոպան Մերձավոր և Միջին Արևելքում իրավիճակի կայունացման հարցում, ինչպես նաև, ինչ է պատրաստվում անել Աֆրիկայում և փախստականների հարցում: Թրամփը, առաջին հերթին, Եվրոպայից սպասում է, որ այն ինքնուրույն կլուծի իր դռան առջև ծառացած խնդիրները»,- ասել է վերլուծաբանը:
Կարդացեք նաև
Մերցը կարծում է, որ նոր ժամանակներ կգան նաև ՆԱՏՕ-ի համար. Թրամփը հստակ ակնարկել է, որ ԱՄՆ-ն այլևս պատրաստ չէ իր վրա վերցնել դաշինքի բյուջեի 70 տոկոսը:
Մյուս կողմից, Մերցը կասկածում է, որ Թրամփի օրոք ԱՄՆ-ը կհրաժարվի Եվրոպայի հետ Տրանսխաղաղօվկիանոսյան գործընկերության համաձայնագրից: «Թրամփը ագրեսիվ է և ճոռոմախոս, բայց նա հիմար չէ, և ամերիկյան տնտեսական հարաբերությունների հարցում նրա փորձը հնարավորություն կտա շեշտակի հաջողություններ գրանցել»,- ենթադրում է Մերցը:
Պատրաստեց՝ Վիկտորյա ԱՆԴՐԵԱՍՅԱՆԸ
