«Ցանկացած ապահովագրական համակարգ, բնականաբար, ենթադրում է որոշակի վճարումներ: Իսկ ամենակարեւոր սկզբունքը, որն առաջարկվում է ներկայացված նախագծով, ներդնել հնարավորինս գումարներ եւ նաեւ կառավարման միջոցով ավելացնել այդ գումարները»,- այսօր մեկնաբանելով
զինծառայողներին աջակցություն ցուցաբերելու ծրագիրը, ասաց աշխատանքի եւ սոցիալական հարցերի նախարար Արտեմ Ասատրյանը:
Կառավարության նիստից հետո, լրագրողների հարցին ի պատասխան, թե ինչո՞ւ են այդ գումարները քաղաքացիներից պահվելու, ինչո՞ւ պետությունը չի հոգում բանակի խնդիրները, պարոն Ասատրյանն ասաց, որ այդ ծրագրով ոչ թե բարեգործական, այլ ապահովագրական համակարգ է նախատեսվում ներդնել, որով յուրաքանչյուր աշխատող քաղաքացի ամսական պետք է վճարի 1000 դրամ:
Ըստ նախարարի, դրանով համակարգին լուծում է տրվում զոհված կամ վիրավոր զինծառայողների ու նրանց ընտանիքների սոցիալական խնդիրներին: Ըստ նրա՝ նվազագույն աշխատավարձ ստացողների վրա բեռը չի կարող ընկնել այս առումով, իսկ մնացած աշխատավարձերի դեպքում նախատեսված է ամսական 1000 դրամ պարտադիր վճար:
Կարդացեք նաև
Հարցին, թե ինչո՞ւ բարձրաստիճան պաշտոնյաների աշխատավարձերից ավելի պահում չի արվում, նախարարը պատասխանեց. «Դրանք մոտեցումներ են, այսինքն՝ դուք էլ եք ինչ-որ մոտեցում առաջարկում, որոնք կարող են քննարկումների փուլ անցնել»:
Մանրամասները` տեսանյութում
Լուսինե ԲՈՒԴԱՂՅԱՆ
