ԱՄՆ նախագահ Դոնալդ Թրամփի ընտրությունից հետո ՌԴ-ԱՄՆ հարաբերությունների սրվածությունը կշարունակվի, ինչը նշանակում է, որ հնարավոր չի լինի ձեռք բերել ԱՄՆ-ՌԴ համաձայնություն ԼՂ հակամարտության կարգավորման հարցում:
«Մեդիա կենտրոնում» հրավիրված քննարկմանը փորձագետները շեշտեցին, որ ռուս-ամերիկյան հարաբերություններում ռիսկը պահպանվում է:
Կովկասի ինստիտուտի փոխտնօրեն, քաղաքագետ Սերգեյ Մինասյանը փաստեց, որ Թրամփի ընտրությունն աննախադեպ էր Ամերիկայի համար՝ սկսած Մադոննայի հայտարարություններից մինչև CNN-ի կեցվածքը: Դառնալով Թրամփի՝ Ալիևի ընտանիքի հետ ունեցած լուրջ կապերի մասին տարածված տեղեկությանը , պարոն Մինասյանն ասաց. «Թրամփն ունի անձնական կապեր Ադրբեջանի հետ, բայց ես չեմ կարծում, որ դրանք վճռական կարող են դառնալ և հակասել ԱՄՆ շահերին»:
Քաղաքագետ, Գլոբալիզացիայի եւ տարածաշրջանային համագործակցության վերլուծական կենտրոնի նախագահ Ստեփան Գրիգորյանն այն քիչ փորձագետներից էր, որը կանխատեսում էր Թրամփի հաղթանակը: Թրամփի՝ Ալիևի հետ ունեցած կապերի մասին տեղեկությունների տարածումը նա համարում է քարոզչական հնարք: Իսկ թե ինչու ԱՄՆ հասարակությունը որոշեց նման ընտրություն կատարել, պարոն Գրիգորյանն ասաց. «Մարդիկ ուզում են փոփոխություններ, նոր մտքեր ու հայտարարություններ, նրանք հոգնել են դասական վերնախավից, խորը մտքերից»: Ըստ Ստեփան Գրիգորյանի՝ հաշվի առնելով Թրամփի՝ անսպասելի լինելու հանգամանքը, նա կարող է դրական անդրադառնալ Հայոց ցեղասպանության ճանաչման հարցում:
Կարդացեք նաև
Միջազգային և անվտանգության հարցերի հայկական ինստիտուտի նախագահ, քաղաքական վերլուծաբան Ստեփան Սաֆարյանը նշեց, որ ինքն անձամբ սպասում և ուզում էր, որ հաղթի Հիլարի Քլինթոնը. «Թրամփը չկտրված ձմերուկ է: Բայց նա հաղթանակի միակ շահառուն չէ, այլ ողջ կուսակցությունը, որը աշխատել է նրա հաղթանակի օգտին»: Ըստ պարոն Սաֆարյանի՝ թեև Ռուսաստանում միգուցե ոմանք այս պահին հույսեր են փայփայում, թե ԱՄՆ-ն ու Ռուսաստանը կհարգեն միմյանց շահերը, բայց դատելով հայտարարություններից՝ ռուս-ամերիկյան հարաբերություններում ռիսկը պահպանվում է:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
