Այսօր հրավիրած ասուլիսում «Համախմբում» կուսակցության առաջնորդ, պատգամավոր Վարդան Օսկանյանը անդրադարձավ 3 կարեւոր հարցերի՝ տնտեսություն, ԼՂՀ հիմնահարց եւ ՀՀ-ի տեղն ու դերը տարածաշրջանում:
Նա ասաց, որ տնտեսությունում բեկում մտցնելու համար անհրաժեշտ է 3 բան: Առաջինը՝ խորքային արմատական բարեփոխումներ՝ քաղաքական եւ տնտեսական: Երկրորդը՝ համարձակ տնտեսական ծրագիր եւ երրորդը՝ դրսից միջոցներ ներգրավելու հնարավորությունների ստեղծում եւ կարողություն:
Ըստ Վարդան Օսկանյանի՝ տնտեսական բարեփոխումների հետ կապված նոր վարչապետը փորձում է ինչ-որ բաներ անել, բայց դա շատ քիչ է. «Օրինակ, ես լուրջ հակասություն եմ տեսնում առաջադրվող քայլերի եւ վերջերս ընդունված նոր Հարկային օրենսդրության միջեւ: Տնտեսության մեջ խիստ քայլերը արդյունքներ չեն կարող տալ»:
Նա ասաց, որ ոչ խորքային քայլեր անելով՝ չեն կարող նաեւ համարձակ տնտեսական ծրագիր իրականացնել. «Տնտեսական բարեփոխումները դատապարտված են՝ առանց քաղաքական բարեփոխումների: Այսօր քաղաքական մենաշնորհը երեւի թե մեր ժողովրդի առաջ կանգնած ամենամեծ վտանգն ու մարտահրավերն է, ավելի՝ քան մեր թշնամու փամփուշտը»: Նա ասաց, որ մեզ պետք է տնտեսական աճ՝ ընդլայնված քաղաքականության ողջ գործիքակազմի կիրառմամբ. «Մեզ պետք է տնտեսական բեկում: Մենք այսօր տնտեսական պատերազմի մեջ ենք, եթե տանուլ ենք տալիս այդ պատերազմը, դատապարտված ենք վատ հետեւանքների: Մենք պետք է տնտեսական բեկում անել, ոչ թե հույսը դնել, մեր զինվորների կյանքի գնով ռազմաճակատում բեկում առաջացնել»:
Կարդացեք նաև
Վարդան Օսկանյանն ասաց, որ եթե ճիշտ բարեփոխումներ կարողանան անել՝ մեծ քանակի ներդրումներ կունենան, եթե հաջորդ ընտրությունները ազատ եւ արդար անցկացնեն ԱՄՆ-ի կողմից մեզ խոստացված Հազարամյակի մարտահրավերների գումարները դեռեւս տրամադրելի են, որոնք հասնում են շուրջ 300 մլն դոլարի: Եթե կարողացանք ԵՄ-ի հետ խորքային, բովանդակային պայմանագիրը ստորագրել, մեզ համար տրամադրելու են Բրյուսելում դոնորների մեծ կոնֆերանս, որը հնարավորություն կստեղծի հաջորդ 4-5 տարիների համար մինչեւ 1 մլրդ դոլարի ներգրավում. «Վերջապես այսօր առկա է Քըրք Քըրքորյանի՝ մինչեւ 2 մլն դոլարի հիմնադրամը, իր կտակը: Եթե մենք կարողացանք ճիշտ քայլեր անել, ճիշտ ծրագրեր ներկայացնել, ճիշտ աշխատել, համախմբած աշխատել ճիշտ մարդկանցով, հնարավոր է նաեւ այդ գումարներից օգտվել»:
Վարդան Օսկանյանը վստահեցրեց, որ այս հնարավորությունների համար աշխատել է պետք եւ ինքը, «Համախմբումը» պատրաստ են բոլոր ջանքերը ներդնել:
Հռիփսիմե ՋԵԲԵՋՅԱՆ
