Իսկ հուլիսից ընդգրկված է «Օպերա Եվրոպա»
խոշոր կազմակերպության ցանկում
Ռուսաստանի Երաժշտական թատրոնների ասոցիացիան (ՌԵԹԱ), որ հիմնադրվել է 2004 թվականին, միավորում է ավելի քան 45 խոշոր երաժշտական թատրոնների, այդ թվում՝ Մոսկվայի եւ Սանկտ Պետերբուրգի առաջատար օպերային թատրոնները: Ասոցիացիայի նախագահն է մեր հայրենակիցը` Մոսկվայի Նատալյա Սացիի անվան պետական ակադեմիական մանկական երաժշտական թատրոնի գեղարվեստական ղեկավար Գեորգի Իսահակյանը: Ասոցիացիայի հիմնական առաքելությունը ռուսական երաժշտական թատրոնների գործունեության հայեցակագի ձեւավորումն է, ավելին՝ Ռուսաստանի եւ ԱՊՀ երկրների երաժշտական թատրոնների տեղեկատվական մշակութային դաշտի ստեղծումը: Այս մասին «Առավոտին» հայտնեց Ալ. Սպենդիարյանի անվան օպերայի եւ բալետի ազգային ակադեմիական թատրոնի տնօրեն Անդրանիկ Արզումանյանը, որը նոյեմբերի 1-5-ը մասնակցել է Մոսկվայում կայացած վերոնշյալ ասոցիացիայի կոնֆերանսին:
Անդրանիկ Արզումանյան
Օպերային թատրոնի տնօրենը նախ նշեց, որ Երեւանի օպերային թատրոնն արդեն ասոցիացիայի անդամ է, հետո հակիրճ ներկայացրեց վերջինիս առաքելությունը: «Օրինակ` գարնանը նույնպես Մոսկվայում կայացած երաժշտական թատրոնների տնօրենների եւ գեղարվեստական ղեկավարների հանդիպման ժամանակ քննարկվել են հաջորդ թատերաշրջանների հեռանկարները»- նշեց տնօրենը: Հավելեց նաեւ, որ նման հանդիպումները հնարավորություն են տալիս թատրոնների տնօրեններին եւ գեղարվեստական ղեկավարներին սերտ կապեր հաստատել, պայմանավորվել միացյալ նախագծերի շուրջ, լուծումներ գտնել ծագած իրավական եւ բարդ բարոյական խնդիրների դաշտում, կարճ ասած՝ զգալ կոլեկտիվ փոխաջակցություն:
«Թատրոնների ղեկավարների աշնանային այս կոնֆերանսը բաղկացած էր մի քանի թեմատիկ հարցերից՝ օրինակ, գործնական սեմինարներ անցկացվեց ռուսաստանյան եւ արտասահմանյան թատերական գործիչների փոխհամագործակցության թեմայով, տեղի ունեցան քննարկումներ եւ կլոր սեղաններ երաժշտական լսարանի երիտասարդացման ուղղությամբ եւ այլն»,-հայտնեց մեր զրուցակիցը:
Կարդացեք նաև
Դմիտրի Բերտմանը
Հարցին՝ կոնկրետ ի՞նչ փոխշահավետ համագործակցություն ձեռք բերվեց Երեւանի օպերային թատրոնի եւ ռուսաստանյան կամ արտասահմանյան որեւէ թատրոնի հետ, պարոն Արզումանյանը պատասխանեց. «Նախնական պայմանավորվածություն ձեռք բերեցինք Մոսկվայի Գելիկոն օպերայի տնօրեն եւ գեղարվեստական ղեկավար Դմիտրի Բերտմանի հետ, ստորագրեցինք համապատասխան փաստաթուղթ` այս թատերաշրջանի ավարտին` այսինքն՝ 2017 թվականի գարնան վերջին Երեւանի օպերային թատրոնում Պուչինիի «Մադամ Բաթերֆլայը» բեմադրելու համար: Այն կիրականացնի երիտասարդ ռեժիսոր Վասիլի Բարխատովը, իսկ նկարչական ձեւավորումը կիրականացնի ճանաչված թատերական բեմանկարիչ Զինովիյ Մարգոլինը: Ներկայացումը մեկ տարի Երեւանում ընթանալուց հետո, կներկայացվի նաեւ Մոսկվայում»:
Հետաքրքրությանը` թե ասոցիացիային անդամակցելը արդյոք հնարավորություն տալի՞ս է թեթեւացնելու բեմադրության ֆինանսական ծանրաբեռնվածությունը, մեր զրուցակիցն առանց մանրամասնելու պատասխանեց՝ այո: Հետո էլ շեշտեց. «Մեր օպերային թատրոնի դեպքում գլխավոր ֆինանսավորողը ՀՀ մշակույթի նախարարությունն է»:
Հիշեցնենք, որ այս տարվա հուլիսից Երեւանի օպերային թատրոնը ընդգրկված է նաեւ «Օպերա Եվրոպա» խոշոր կազմակերպության ցանկում, որտեղ 33 երկրներից 110 թատրոններ են ընդգրկված:
ՍԱՄՎԵԼ ԴԱՆԻԵԼՅԱՆ
«Առավոտ»
09.11.2016
