Ինչպես արդեն տեղեկացրել ենք, «Նաիրիտ» գործարանի աշխատակիցները լրագրողների հետ հանդիպման ընթացքում աշխատակիցները բողոքում էին այն հանգամանքից, որ գործարանի տնօրեն է նշանակվել նախկինում իրավախորհրդատու Ռաֆայել Սանդոյանը: Ասուլիսին մասնակցում էր նաեւ «Նաիրիտ» գործարանի արհմիության նախագահ Հրաչ Թադեւոսյանը:
«Նոր տնօրենին չի կարելի կապել այն ժամանակվա գործարքների հետ, նոր տնօրենը այն ժամանակ եղել է ընդամենը խորհրդական, իսկ Վահան Մելքոնյանը ուներ 10-15 խորհրդական, այդ մի խորհրդականը չէր: Նոր տնօրենին այդ հարցերի մեջ մեղադրելը մի քիչ կոռեկտ էլ չեմ համարում»,- ասաց նա:
Հրաչ Թադեւոսյանը ասաց, որ իր համար կարեւոր չէ, թե ով է գործարանի տնօրենը, իր համար կարեւոր է, որ տնօրենը իր պարտականություններն իրականացնի. «Երեկ չէ առաջին օրը մի 30 հոգի արտադրամասի պետեր հավաքվել էին աշխատավարձի համար գնացել էին նոր տնօրենի մոտ, նոր տնօրենն ասում է՝ ես էներգետիկայի եւ բնական պաշարների նախարարը կոնկրետ ժամկետ դեռ չի կարողանում նշել, թե աշխատավարձի հարցն ինչպես պետք է լուծվի: 4 ամսվա 260 հոգու աշխատավարձի պարտք այս պահի դրությամբ կա: Մարդուն ժամանակ են տվել, ասել են՝ 10 օր Ձեզ ժամանակ, պարո՛ն տնօրեն, մեր աշխատավարձի հարցերով զբաղվեք: Ամսի 17-ին տնօրենը պետք է այդ մարդկանց պատասխան տա՝ աշխատավարձի պարտքի հարցն ինչպես է լուծվելու»:
Նա ընդգծեց, որ նոր տնօրենի նշանակումից ոչինչ չի փոխվում. «Ոչ մի բան էլ չի փոխվում՝ 3 օր առաջ Սաղաթելյանն էր, այսօր Սանդոյանն է, 3 օր առաջ էլ գործարանը չէր աշխատում, աշխատավարձների պարտքերը կային, այսօր էլ նույն բանն է: Ես Սաղաթելյանի հետ խոսել եմ լսել եմ իր գործընկերներից, որ Սաղաթելյանը ոչ թե մի երկու օր առաջ է նախատեսել հրաժարական տալ, այլ նախկին նախարարի ժամանակից: Երեւի իր նյարդային համակարգը, որ իրեն վերեւները չեն աջակցում, հարցերը առաջ չեն գնում, մարդ է՝ հիասթափվել է, որոշել է չաշխատել, վերջում հարգել են իր դիմումը: Թե ինչո՞ւ են Սանդոյանին դրել, այդ հարցը պետք է տանք նախարարին կամ վարչապետին. մի՞գուցե տեղակալներից մի քանիսին առաջարկել չեն համաձայնվել, ես չեմ կարծում, որ Սանդոյանն այնքան ուրախ է, որ իրեն տնօրեն են նշանակել»:
Կարդացեք նաև
Ամի ՉԻՉԱԿՅԱՆ
Լուսանկարը՝ «Նոյյան տապանի»:
