«Ես չեմ ցանկանում շտապել իմ եզրակացությունների մեջ: Սպասենք պարոն Թրամփի քայլերին, որից հետո հետեւություններ կանենք»,- Aravot.am-ի հետ զրույցում ասաց Հայ-ամերիկյան պատգամավորական բարեկամական խմբի ղեկավար, ՀՀԿ ԳՄ անդամ Սամվել Նիկոյանն`անդրադառնալով ԱՄՆ նախագահական ընտրությունների պաշտոնական արդյունքներին:
Ըստ այդմ, քարոզարշավի ողջ ընթացքում երբեմն նույնիսկ էքսցենտրիկ պահվածքով եւ հայտարարություններով աչքի ընկնող, միլիարդատեր թեկնածու Դոնալդ Թրամփը հաղթանակ է գրանցել:
Սամվել Նիկոյանը նկատում է՝ փորձը ցույց է տալիս, որ ԱՄՆ նախագահի թեկնածուները շատ խոստումներ են տալիս, տարաբնույթ հայտարարություններ անում, ուղենիշեր գծում, բայց ընտրություններից հետո, արդեն նրանց գործունեության ընթացքում, փոփոխություններ են նկատվում: Իբրեւ հայերիս հետաքրքրող ամենավառ օրինակ, նա բերում է Ցեղասպանության հարցի ճանաչումը`հավելելով, որ ԱՄՆ նախագահի շատ թեկնածուներ են իրենց նախընտրական խոստումներում ընդգրկել այդ հարցը: Մինչդեռ, ընտրություններից հետո արդեն բոլորովին այլ մոտեցում են դրսեւորել:
«Այն, ինչը հաճախ ասվում է քարոզարշավի ժամանակ, երբեք էլ այն չէ, որ քաղաքական գործիչները պատրաստվում են ամբողջությամբ անել: Ուղղակի, հանրության շրջանում գտնում են թիրախավորված շերտեր, անում ականջահաճո հայտարարություններ`շահելով ձայներ»,- ասում է ՀՀԿ-ական թեկնածուն, այնուհանդերձ կարեւորելով, որ քաղաքական դաշտում եւ ամենաառանցքային պաշտոններից մեկում է հայտնվել միլիարդատեր մի մարդ, որը քաղաքական կենսագրություն չունի: Իր համոզմամբ, վերջին տասնամյակների համար այս նոր քաղաքական իրողությունն իր դրսեւորումները կունենա արեւմտյան երկրներում:
Կարդացեք նաև
Aravot.am-ի հարցին ի պատասխան`արդյոք աշխարհաքաղաքական փոփոխությունների շեմին ենք, Սամվել Նիկոյանն ասաց, որ չի բացառում, որ Վաշինգթոնի նոր դեմքը որոշակի շեշտադրումային փոփոխություններ կատարի, բայց գլոբալ իմաստով ԱՄՆ-ի քաղաքականությունը չի կարող փոխվել, քանի որ այդ երկրում մեկ անձը որոշիչ չէ, այնտեղ ինստիտուտներն են աշխատում:
ՀՀԿ-ական պատգամավորին հատկապես տպավորել է, որ ծանր եւ դաժան մրցապայքարից հետո պարտվող կողմը սեղմեց հաղթողի ձեռքը եւ ցանկացավ հաջողություն. «Սա իրենց մոտ պետականորեն արժեհամակարգի է վերածվել: Շնորհավորում եմ ամերիկյան ժողովրդին, նա կատարել է իր ընտրությունը»:
Մանրամասները`տեսանյութում
Նելլի ԳՐԻԳՈՐՅԱՆ
