«Հայելի» մամուլի ակումբում այսօր Aravot.am-ը ՀՀ արտակարգ եւ լիազոր դեսպան Արման Նավասարդյանից հետաքրքրվեց, թե մերձավորարեւելյան քաղաքականության առումով որքանո՞վ են կանխատեսելի ռուս-ամերիկյան հարաբերություններում փոփոխությունները՝ հաշվի առնելով այն փաստը, որ ԱՄՆ-ն նոր նախագահ ունի:
«Շատ բան կախված է նրանից, թե ինչ դիրքորոշում կունենա ԱՄՆ նախագահը: Հալեպում քաոս է: Եթե ԱՄՆ-ի եւ Ռուսաստանի քաղաքականության միջեւ արագ փոփոխություն չեղավ, տարածաշրջանի քարտեզը կվերաձեւավորվի»,-պատասխանեց Արման Նավասարդյանը:
Ըստ նրա, եթե Ռուսաստանն ու ԱՄՆ-ն գան ընդհանուր հայտարարի եւ հսկողություն տակ վերցնեն մերձավորարեւելյան տարածաշրջանը, իրավիճակը կշտկվի. «Բայց խիստ փոփոխություն լինել չի կարող, որովհետեւ երկու պետությունների շահեր են բախվում: Սիրիայի ճակատագիրը վճռված է՝ վատ առումով»:
Հարցրեցինք նաեւ, թե արդյոք սպառնո՞ւմ է Թուրքիայի «ազգային ուխտը» Հայաստանին: «Նայած ինչ զարգացում կունենա Էրդողանի հայտարարությունը, թե Մոսուլն ու Հալեպը իրենցն են: Կախված է նրանից, թե գերտերությունները Թուրքիային որքանով կթողնեն տարածքային նկրտումներն իրականություն դարձնել: Թուրքիայի վարդագույն երազանքն է Օսմանյան կայսրության վերականգնումը: Այդ դեպքում խնդիրներ կունենանք»:
Կարդացեք նաև
Լուիզա ՍՈՒՔԻԱՍՅԱՆ
