ՀՀ-ում Լեհաստանի Հանրապետության արտակարգ և լիազոր դեսպան Եժի Մարեկ Նովակովսկին հույս ունի, որ մինչև տարեվերջ կստորագրվի ՀՀ-ԵՄ համագործակցության պայմանագիր:
«Մեդիա կենտրոնում» հրավիրված քննարկմանը հարցին՝ այդ պայմանագրի ստորագրման գործընթացին խոչընդոտող գործոններ տեսնո՞ւմ է, Լեհաստանի դեսպանը պատասխանեց. «Հույս ունեմ, որ այլևս որևէ խոչընդոտ չի առաջանա այս պայմանագրի ստորագրման հետ կապված: 2013-ին Հայաստանն առաջատար դիրք էր գրավում այս համաձայնագրի ստորագրման հետ կապված, սակայն ընտրեց Եվրասիական տնտեսական միությունը: Բայց, այդուհանդերձ, այս պայմանագիրը թույլ է տալիս, որ ՀՀ-ն դառնա Եվրամիության բնական անդամ»:
Դառնալով ԱՄՆ 45-րդ նախագահի պաշտոնում Դոնալդ Թրամփի ընտրությանը՝ պարոն Նովակովսկին հիշեցրեց ՀՀ-ում ԱՄՆ դեսպան Ռիչարդ Միլլսի այն հայտարարությունը, թե ԱՄՆ-ի արտաքին քաղաքականության 80 տոկոսը սովորաբար պահպանվում է, միայն 20 տոկոսն է, որ նոր նախագահի առաջնահերթություններն են:
Դեսպանը մտահոգություն հայտնեց, որ հայ-լեհական առևտրատնտեսական հարաբերություններում կան խնդիրներ, մասնավորապես փոքր են առևտրաշրջանառության ծավալները, բայց նաև փաստեց. «Անցյալ տարի մեր տնտեսական հարաբերություններն աճ են գրանցել: Ապրանքափոխանակությունը 60-80 միլիոն դոլար է կազմում տարեկան: Իհարկե, այն այնքան էլ գոհացուցիչ չէ»:
Կարդացեք նաև
Դեսպանը նշեց, որ իրենք հետաքրքրված են նաև տուրիզմի զարգացման ոլորտով: Այս համատեքստում պարոն Նովակովսկին շեշտեց. «Եթե Հայաստանն ուզում է դառնալ եվրոպական ընտանիքի անդամ, ապա պետք է ուշադրություն դարձնի իր ճանապարհային ենթակառուցվածքներին»:
Հարցին՝ ինչո՞ւ չի ստացվում, որ հայկական ապրանքները ողողեն եվրոպական շուկան, նա պատասխանեց. «Խնդիրն այն է, որ հայկական ապրանքատեսակները Եվրոպայում կամ Լեհաստանում անհայտ են, գնորդները տեղյակ չեն: ՀՀ-ն որպես բրենդ ճանաչված է, բայց կոնկրետ ապրանքատեսակների հետ չի ասոցացվում, Հայաստանը որպես այս կամ այն ապրանքն արտադրող երկրի բրենդ չի ընկալվում»:
Մյուս հարցին՝ արդյոք Հայաստանն ու Լեհաստանը մարտական տանկերի մոդեռնիզացման ծրագիրը կշարունակե՞ն, պարոն Նովակովսկին պատասխանեց. «ՀՀ ՊՆ-ն և կառավարությունը որոշեցին, որ Հայաստանին պատկանող տանկերի վերանորոգումը, մոդեռնիզացման գործընթացը կատարելու է Ռուսաստանը: Դա ընդունեցինք ցավով, բայց ըմբռնումով: Սակայն նշենք, որ այս ոլորտում լեհական ընկերությունները ամենևին չեն զիջում ռուսականին և ունեն մեծ պահանջարկ»:
Հարցին՝ արդյոք կենսաչափական անձնագրերի՝ լեհական ընկերության կողմից արտադրությունը կշարունակվի՞, պարոն դեսպանն ասաց, որ որոշումը հայկական կողմինը պետք է լինի, քանի որ լեհական ընկերությունը պատրաստ է:
Եժի Մարեկ Նովակովսկին տեղեկացրեց նաև նոյեմբերի 11-ին Լեհաստանի ազգային տոների՝ Անկախության և Սահմանադրության օրերին նվիրված միջոցառումների մասին. «Անկախության տոնը նշվում է 1989-ից՝ կոմունիստական բարքերի տապալումից հետո: Հայերի համար անկախության տոնը նույն կշիռն ունի, ինչ լեհերի համար, քանի որ Հայաստանը ևս հարյուրավոր տարիներ զրկված է եղել անկախությունից»:
Լեհաստանի ազգային տոների կապակցությամբ նոյեմբերի 11-ին, ժամը 19.00-ին, «Արամ Խաչատրյան» համերգասրահում հանդես կգա «Կրակովի կապելլան»:
Ազգային ֆիլհարմոնիկ նվագախմբի գլխավոր պրոդյուսեր Արման Պադարյանն էլ փաստեց, որ Լեհաստանի դեսպանատան հետ առաջին անգամ չէ, որ համագործակցում են: Դառնալով նոյեմբերի 11-ի համերգին՝ պարոն Պադարյանն ասաց, որ հանդիսատեսը հնարավորություն կունենա ունկնդրելու ինչպես միջնադարյան լեհական երաժշտություն, այնպես էլ հայտնի լեհ կոմպոզիտորների երաժշտություն:
Հայտարարվեց նաև նախաձեռնության մասին, համաձայն որի՝ կոչ են անում Լեհաստանի խորհրդանիշներով նկարվել ՀՀ-ի գեղատեսիլ վայրերից մեկում և լուսանկարը տեղադրել սոցցանցերում՝ my polska հեշթեգով:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
