2015թ. հունվարի 6-ին՝ Սուրբ Ծննդյան օրը Տավուշի մարզի Իջեւանի տարածաշրջանի սահմանամերձ Վազաշեն գյուղում սպանվել է Վազաշենի հարեւան՝ սահմանամերձ Այգեհովիտ գյուղի բնակիչ 22-ամյա Սամսոն Մելքումյանը: Նա բարձրագույն կրթություն ուներ, տիրապետում էր մի շարք մարզաձեւերի: Ս. Մելքումյանի մահին նախորդել էր մի խումբ երիտասարդների միջեւ վիճաբանությունը: Այդ դեպքով կալանավորվել է Վազաշենի 28-ամյա բնակիչ,որը հետո ազատ է արձակվել:
Դեպքի կապակցությամբ քրեական գործ է հարուցվել ՀՀ քրեական օրենսգրքի 104 հոդվածի 1-ին մասով («Սպանությունը»): Գործի քննությունը կատարում է ՀՀ քննչական կոմիտեի Տավուշի մարզային քննչական վարչությունը: Այդ վարչությունից տեղեկացանք, որ քրեական գործի քննությունն ավարտված է, սակայն Տավուշի մարզի դատախազությունը քրեական գործը դատարան չի ուղարկում: Տավուշի մարզի դատախազ Արմեն Մարուխյանին հարցրինք, թե ինչո՞ւ սպանության գործը դատարան չի ուղարկվում: Մարզի դատախազն ասաց, որ քրեական գործի քննությունն ավարտված չէ, լրացուցիչ դատաբժշկական փորձաքննություն պետք է իրականացվի:
Ոսկան ՍԱՐԳՍՅԱՆ
