Փորձագետների համոզմամբ` թվայնացումն անխուսափելի և պարտադրված էր Հայաստանի համար, բայց մյուս կողմից նաև առաջընթացային քայլ է, սակայն այդ գործընթացի պատճառով մի շարք քաղաքացիներ զրկվել են հեռուստատեսության հասանելիությունից:
«Նոյյան տապան» մամուլի սրահում այս թեմայով հրավիրված քննարկմանը փորձագետները մտահոգություն հատնեցին, որ այսպիսով խախտվում են անձի իրավունքները: Հեռարձակման թվայնացումից հետո ոչ նոր սերնդի հեռուստացույց ունեցող քաղաքացիները ստիպված են ձեռք բերել կցորդ սարքեր, որպեսզի կարողանան օգտվել հեռուստատեսությունից: Սակայն այդ սարքերի որակն ու գինը հաճախ պատճառ են դառնում, որ քաղաքացիներն ուղղակի չկարողանան ձեռք բերել դրանք:
«Սոցիոմետր» անկախ սոցիոլոգիական կենտրոն ՍՊԸ-ի տնօրեն Ահարոն Ադիբեկյանը հայտարարեց, որ կցորդ սարքերի գինը չպետք է ավելին լիներ, քան 10 դոլարը. «Մյուս տարբերակն այն էր, որ քաղաքացիներին այդ սարքերը տրամադրվեին մարման եղանակով: Սա նման է հաշվիչ մեքենաների` փոքր բիզնեսներում ներդնելու գործընթացին»:
Սպառողների ասոցիացիայի նախագահ Արմեն Պողոսյանն այս խնդիրների առաջացման պատճառ է համարում տեսչությունների վատ աշխատանքը. «Թվայնացումն առաջընթաց է, որից հետ մնալ չենք կարող: Խնդիրն այն է, թե ինչքանով է մեր բնակչությունը պաշտպանված, որ ստանա որակյալ ծառայություն. այն ապրանքը, որը կոչվում է կցորդ, լինի որակյալ»:
Կարդացեք նաև
Պարոն Պողոսյանը տեղեկացրեց, որ այս խնդիրը բարձրաձայնել է ՀՀ վարչապետի հետ քննարկման ընթացքում: Արմեն Պողոսյանը վրդովված է, թե ինչու պետք է մարդիկ զրկված լինեն հեռուստատեսության հասանելիությունից, նրանք ճամփորդելու, անգամ թատրոն գնալու հնարավորություն չունեն, հիմա էլ զրկվում են հեռուստատեսությունից. «Ես հայտարարում եմ, որ այդ ապրանքը` շուկայում հայտնված կցորդները ապօրինի են` հաշվի առնելով դրանց որակը, երաշխիքի բացակայությունը: Ուստի տեսչության առաքելությունն է պարզել` ինչպես է այդ ապրանքը հայտնվել մեր շուկայում: Չկա նաև գների վերահսկման եղանակ»:
Ահարոն Ադիբեկյանը նշեց, որ խախտվում են քաղաքացու իրավունքները. «Պետք է ապահովեին սարքավորումներով այն քաղաքացիներին, որոնք չունեն նոր հեռուստացույցներ, մինչև նրանք կարողանային նոր հեռուստացույց ձեռք բերել: Թե չէ այսպես մարդիկ հոգեբանական լուրջ խնդիրների առաջ կարող են կանգնել: Մարդը դառնում է ինքնամեկուսացված: Մարդիկ կան, որ սերիալներն իրենց նարկոտիկներն են: Ստացվում է, որ սա լավ նախաձեռնություն է վատ կատարված»:
Լուսանկարը` «Նոյյան տապան»-ի
Տաթև ՀԱՐՈՒԹՅՈՒՆՅԱՆ
