«Բարի «ձմեռ պապիկներին» չեմ հավատում: Այդ պատճառով նման նվերները կարող են վատ ավարտ ունենալ՝ ինչպես 2014 թվականին, երբ Հայաստանը Ռուսաստանից էժան գազ ստացավ, բայց հետո պարզվեց, որ 300 միլիոն դոլարի չափով տարբերություն է պարտք»,-այսօր «Հայացք» ակումբում ասաց ՀԱԿ անդամ, տնտեսագետ Վահագն Խաչատրյանն՝ անդրադառնալով գազի սակագնի իջեցմանը: Ըստ նրա, «Գազպրոմը» պատրաստվում է օգնել Հայաստանին, բայց այս օգնությունն, ինչպես ասաց պարոն Խաչատրյանն, անշահախնդիր չէ:
Պարոն Խաչատրյանի դիտարկմամբ՝ գազի սակագնի նվազեցման հետեւանքով «Գազպրոմ Արմենիան» մոտ 15 միլիարդ դրամ կկորցնի:
Երեկ Ազգային ժողովում լրագրողների հետ ճեպազրույցում ՊԵԿ նախագահ Վարդան Հարությունյանն ասել է. «Պետությունը հանդիսանում է փայատեր ցանկացած բացված բիզնեսի: Եթե բիզնեսմենը պարկեշտ, առանց խաբելու պետության փայաբաժինը վճարում է, մենք պետք է ուղղակի խթանենք այդ բիզնեսի զարգացմանը: Իսկ եթե կլինեն բիզնեսներ, որոնք կփորձեն թաքցնել, պայքարելու ենք նաեւ այդ բիզնեսների դեմ»:
ՊԵԿ նախագահի այս հայտարարության առնչությամբ Վահագն Խաչատրյանն ասաց, որ պետությունն իրավունք չունի փայ մտնել բիզնեսին. «Նա ասել էր, որ պետությունը փայատեր է ցանկացած բիզնեսի, եւ այդ փայի ներկայացուցիչը հարկային մարմինն է: Սա շատ վտանգավոր երեւույթ է, գռեհիկ սոցիալիզմի դրսեւորում է: Դրանով փորձում են խաթարել մասնավոր բիզնեսի անձեռնմխելիությունը»:
Կարդացեք նաև
Կառավարության 2017 թվականի բյուջեն համեմատելով 2016-ի հետ, տնտեսագետն ասաց, որ այն զիջում է այս տարվա բյուջեին՝ բոլոր բաղադրիչներով, առաջին հերթին՝ մակրոտնտեսական ցուցանիշների կանխատեսմամբ:
Հայաստանի պետական պարտքն, ըստ տնտեսագետի, մոտենում է 6 միլիարդի, եւ դա փակելու համար մենք ստիպված ենք նորից պարտք վերցնել: Այս իմաստով, ինչպես ասաց պարոն Խաչատրյանը, փակ շրջանի մեջ ենք. «Մեզ պահում ենք վատ վարկառուի պես, որը անընդհատ վարկեր է վերցնում, չի կարողանում մարել դրանք, տունն է գրավ դնում, մեքենան, հետո այլևս ոչինչ չի մնում գրավ դնելու»:
Նելլի ԲԱԲԱՅԱՆ
