«2017թ. խորհրդարանական ընտրություններին ընդառաջ՝ բացի իշխանությունից, այլ քաղաքական ուժերը, կարելի է ասել, պատրաստ չեն արմատական փոփոխություններ մտցնելու եւ մարտահրավեր նետելու»,-կարծում է քաղաքագետ Ռուբեն Մեհրաբյանը:
Պատճառները, ըստ նրա, գաղափարական անհստակությունն ու ներուժի բացակայությունն են. «Ոչ թե մեղադրում եմ ընդդիմադիրներին, այլ իրականությունն եմ փաստում: Դա նաեւ ՀՀ տնտեսական մոնոպոլիզմի եւ տնտեսական օլիգարխիզացիայի քաղաքական արտացոլումն է»,-այսօր «Տեսակետ» մամուլի ակումբում ասաց Ռուբեն Մեհրաբյանը:
Նրա դիտարկմամբ՝ ՀՀ ներքաղաքական դաշտում առաջիկայում շատ բան կախված է «ֆորս մաժորային» իրավիճակներից, որոնք կարող են Ռուսաստանից չափազանց մեծ կախվածության հետեւանք լինել. «Ռուսաստանը խարխլվել է եւ ցանկացած պահի ինչ ասես՝ կարող է տեղի ունենալ այնտեղ: Որքանո՞վ են մեր քաղաքական ուժերը պատրաստ անսպասելի զարգացումների, կարծում եմ՝ պատրաստվածության աստիճանը ցածր է»:
Քաղաքագետի բնորոշմամբ. «Ռուսաստանում ցանկացած «ֆորս-մաժոր» կարող է ճակատագրական դառնալ Պուտինի ռեժիմի համար. «Արեւմուտքը կոշտացրել է քաղաքականությունը Ռուսաստանի հանդեպ: Եթե լինեն պատժամիջոցներ, դրանք ինչպե՞ս կանդրադառնան Ռուսաստանի տնտեսության վրա: Հաշվի առնելով, թե որքան մեծ է ՀՀ-ի կախվածությունը Ռուսաստանից, դա չի կարող չանդրադառնալ Հայաստանի վրա»:
Կարդացեք նաև
Անդրադառնալով ՀԱԿ եւ«Համախմբում» կուսակցությունների միջեւ հնարավոր դաշինքին, բանախոսն ասաց. «Ցածր վարկանիշ ունեցող ուժերի մասին է խոսքը, նրանց միավորումը էական գործընթացի չի բերի»:
Լուիզա ՍՈՒՔԻԱՍՅԱՆ
