Արաբկիր և Քանաքեռ-Զեյթուն վարչական շրջանների ընդհանուր իրավասության դատարանն այսօր մերժեց 2010 թվականին բանակում խաղաղ պայմաններում մահացած Վալերի Մուրադյանի մոր՝ Նանա Մուրադյանի բողոքը։ Նա պահանջել էր վերացնել Քննչական կոմիտեի՝ անցած տարվա դեկտեմբերի յոթի և Զինվորական դատախազության այս տարվա փետրվարի 19-ի որոշումները՝ իր որդու գործի վարույթը կասեցնելու մասին:
«Հույսներս վաղուց ենք կտրել, որ մի բան տղայիս գործով կփոխվի, բայց միեւնույնն է պայքարելու ենք, որովհետեւ ինչ-որ մի տեղ հույս է մնում, որ արդարությունը կվերականգնվի, թեկուզ իշխանություն կփոխվի, բայց կվերականգնվի: Ես չեմ հանձնվելու կբողոքարկեմ Վերաքննիչ դատարան, դրանից հետո՝ Վճռաբեկ: Ասել եմ, որ եթե Վճռաբեկ դատարանն էլ ոչինչ չարեց, կբողոքեմ, գործը կուղարկեմ Մարդու իրավունքների Եվրոպական դատարան: Ամոթ թող լինի հենց մեր պետությանը, որ մեր Հայաստանի հանրապետության զինվորին սպանում են, եւ այդ գործը բացահայտելու համար մենք պետք է դիմենք Եվրոպական դատարան: Ամոթ լինի այս երկրին, եւս մեկ անգամ թող խայտառակվեն, ինչ կարող ենք մենք անել այս իշխանության, այս համակարգի դեմ: Համակարգային փոփոխություն պետք է լինի, որ ինչ-որ արդյունքի հասնենք»,- Aravot.am-ին ասաց Նանա Մուրադյանը:
Հիշեցնենք, որ պաշտոնական տեղեկատվության համաձայն, 2010 թվականի մարտի 15-ին Ստեփանակերտի զորամասերից մեկի զինծառայող Վալերի Մուրադյանը ինքնասպան է եղել կախվելու միջոցով։
Հիշեցնենք նաեւ, որ որդու մահվանից տասնվեց տարի անց տիկին Մուրադյանը չի դադարեցնում իր պայքարը՝ պնդելով, որ որդին ոչ թե ինքնասպան է եղել, այլ նրան սպանել են. «Տղայիս գործով ոչ մի փորձաքննություն պատշաճ չի կատարվել: Կարեւոր իրեղեն ապացույցներից՝ տղայիս կոշիկներից ու աթոռից, հետքեր չեն վերցրել: Եթե իրենց ասելով՝ տղաս աթոռը վերցրել, գնացել է դեպքի վայր ու կանգնել այդ աթոռի վրա ինքնասպանություն գործել, պետք է հետքեր լինեին, մատնահետքեր լինեին: Քննիչին հարցնում ենք՝ ինչու չես վերցրել, ասում է դիակի ստորին վերջույթների ու գուլպաների վրա վնասվածքներ չենք հայտնաբերել, կարեւոր չեմ համարել կոշիկները փորձաքննության ենթարկել: Բա կոշիկները որտեղ է, հարցնում ենք, ասում է՝ մնացել է կամ զորամասում կամ իրեղեն ապացույցների պահման սենյակում, այն պարագայում, երբ ինքը թվարկել է, որ դեպքի վայրից առգրավել է համազգեստն ու զինվորական կոշիկները, բայց կոշիկները այդ հագուստի հետ չէ: Այսինքն, դիտավորյալ կոշիկները վերացրել է, որ հետքեր չվերցնեն, գործը տանեն փակուղի»:
Կարդացեք նաև
Արփինե ՍԻՄՈՆՅԱՆ
