Ռազմինֆո կայքի վերլուծաբան Տարոն Հովհաննիսյանը քիչ հավանական է համարում, որ 500 կիլոմետր հեռահարությամբ հրթիռային համակարգեր ձեռք բերելու շուրջ Պակիստանի հետ Ադրբեջանի ինտենսիվ բանակցություններ վարելու մասին լուրը համապատասխանում է իրականությանը:
Հիշեցնենք, որ բանակցությունների մասին լուրը տարածել է ռուսական «Նեզավիսիմայա գազետան»:
«Ռուսական լրատվամիջոցում տեղ գտած նյութը խիստ անհասկանալի է, չկա որեւէ հստակ հղում, թե որտեղից է ստացել այդ տեղեկությունը: Հեղինակը ադրբեջանցի է, առաջին հայացքից այս տեղեկությունը քարոզչական նյութի տպավորություն է թողնում: Ինչը հաստատում է նաեւ այն, որ այդ հայտարարությունը ադրբեջանական լրատվամիջոցներից որեւէ մեկում չկա: Այս տեղեկությունը տարածելով՝ Ադրբեջանը փորձում է ցույց տալ Ռուսաստանին, որ եթե իրենց զենք չվաճառեն, իրենք կարող են Պակիստանից գնել կամ ուրիշներից: Ամեն դեպքում, հրթիռների ձեռք բերման վերաբերյալ հստակ բանակցությունների մասին պաշտոնական հայտարարություն կամ տեղեկություն Ադրբեջանից չի եղել: Իմաստ չունի այս պահին խոսել՝ արդյոք հնարավոր 500 կմ հեռահարությամբ հրթիռները կարող են մրցակից լինել Իսկանդերներին, քանի որ հստակ տեղեկություն դեռ չկա»,- Aravot.am-ին ասաց վերլուծաբանը:
Հիշեցնենք, որ Պակիստանի հետ սպառազինության համատեղ արտադրություն սկսելու մտադրության մասին պաշտոնական Բաքուն հայտարարել էր դեռևս անցած տարվա մարտին, երբ Ադրբեջան էր ժամանել Պակիստանի վարչապետ Նավազ Շարիֆը: Խոսքը Ադրբեջանի ռազմաարդյունաբերական ոլորտ կես միլիարդ դոլար ներդնելու Պակիստանի մտադրության մասին է: «Դա ապատեղեկատվություն է: Իրականում Պակիստանի առևտրի և ռազմարդյունաբերության նախարարները հայտարարել են, որ պատրաստվում են առաջիկա 5 տարվա ընթացքում Ադրբեջանի հետ երկկողմ առևտրաշրջանառությունը հասցնել 500 մլն դոլարի: Չենք կարող բացառել, որ Պակիստանն ու Ադրբեջանն ընդհանուր արտադրություն կսկսեն , ամեն դեպքում, մինչեւ այժմ միայն այդ հայտարարություններն են եղել, որեւէ փաստ չունենք, որ իրոք սկսում են: Եթե ավելի խորը նայենք հարցին, Պակիստանը Հնդկաստանի հետ կապված հարաբերություններում, Քաշմիրի խնդրում դաշնակիցներ է փնտրում, որոնք կպաշտպանեն իրեն թեկուզ հայտարարությունների մակարդակով: Պակիստանը միակ երկիրն է, որը չի ճանաչել Հայաստանը, բայց ամեն դեպքում մինչեւ այժմ բացի այդ հայտարարություններից, թե սպառազինության համատեղ արտադրություն են սկսելու, դեպի ռեալ համագործակցության անցում չի եղել: Եթե նայենք անցած տարվա այս երկու երկրների առեւտրաշրջանառության ծավալները, Ադրբեջանից արտահանումը դեպի Պակիստան գրեթե բացակայում է, Պակիստանից դեպի Ադրբեջան՝ նույնպես: Այսինքն, իրական ծավալներն առայժմ չեն համապատասխանում այդ հայտարարությունների ծավալներին», ասաց պարոն Հովհաննիսյանը:
Կարդացեք նաև
Արփինե ՍԻՄՈՆՅԱՆ
