Գյումրու Անի թաղամասի Հակոբ Մծբնեցի եկեղեցու շուրջ հավաքվող թոշակառու տղամարդկանցից այսօր հետաքրքրվեցինք, թե կհաջողվի՞ վարչապետ Կարեն Կարապետյանը պայքարել ապօրինի հարստացման դեմ, քրեականացնել այս երևույթը։
Նշենք, որ այս եկեղեցու շուրջ տարեց տղամարդիկ տարվա բոլոր եղանակներին, նույնիսկ սառնամանիքին հավաքվում են զբաղմունք չունենալու պատճառով ու սովորաբար քննարկում մեր երկրում կատարվող ամենավերջին իրադարձությունները։ Մեր զրուցակիցները, ցավոք, լավատես չէին․ նրանցից մեկը պնդեց, որ վարչապետն այս պայքարում կմնա միայնակ, քանի որ նրան կճնշեն։
Ըստ նրա, 2 միլիոն բնակչությունից կես միլիոնն ապօրինի հարստացած են ու հենց վարչապետին շրջապատող մարդիկ են։ Մեկ այլ տղամարդ էլ նշեց․ «Եթե ուզում է պայքարել, ղեկավարության մեջ ինչքան մարդ կա, ինչքան կազմակերպության ղեկավար կա, բոլորին պիտի վերացնի, դա էլ երբեք չի լինի ու վարչապետը կմնա մենակ»։
Զրույցի ընթացքում մեզ մոտեցավ մի պապիկ՝ Սահակյան Ֆայեմբերգը (լուսանկարում եկեղեցու աստիճաններին նստած ակնոցներով տղամարդն է) ու բողոքեց, որ ինքը 35 տարի աշխատել է արդուկի գործարանում, թունավոր արտադրամասում, 50 տարեկանից են թոշակի ուղարկել, սակայն հիմա ստանում է ընդամենը 48 հազար դրամ թոշակ ու ընտանիքի 4 գործազուրկ անդամներին այդ խղճուկ գումարով է պահում։ «Բա էսպես կնայեն ժողովրդին, մի քանի օր առաջ գնացել էի սոցապ, մոտեցա սոցապի պետին, ասի՝ ուզո՞ւմ ես ինձ մի լավություն անես, ասեց՝ հա, ինչի՞ չէ, ասի՝ իմ հուղարկավորության համար նախատեսված 200 հազար դրամը հիմի հատկացրու էլի»,- պատմեց թոշակառու տղամարդը։
Կարդացեք նաև
Նունե ԱՐԵՎՇԱՏՅԱՆ
