«Ի պաշտպանություն Հովհաննես Հարությունյանի» քաղաքացիական նախաձեռնությունը իր նամակ-պահանջը փոխանցեց նաեւ առողջապահության նախարարություն:
Նախաձեռնության 3 անդամներին՝ Դավիթ Սանասարյանի, Հովսեփ Խուրշուդյանի եւ Հովհաննես Հարությունյանի քրոջ՝ Թամարա Հարությունյանի հետ հանդիպեց առողջապահության փոխնախարար Վահան Պողոսյանը: Նախաձեռնության անդամները իրենց մտահոգություններով կիսվեցին փոխնախարարի հետ: Վերջինս ասաց, որ հուլիսի 17-ից սկսած՝ առողջապահության համակարգը, շտապօգնության ծառայությունը եւ ընդգրկված բոլոր բուժաշխատողները եւ բուժհիմնարկները եղել են եւ երթերի մասնակիցների, եւ Խորենացի փողոցում գտնվողների կողքին:
«Առողջապահության նախարարությունը եւ համակարգը միշտ պատրաստ է, անկախ որեւէ հանգամանքից, բոլորին բուժօգնություն ցուցաբերել: Ես անձամբ այցելել եմ իրեն առաջին օրը որ եղել է հիվանդանոցում, տեսել եմ վիրահատությունից առաջ եւ հետո, ընթացքը գիտեմ, մի քանի նամակագրություն է եղել: Մեզ դիմել են պատգամավորներ, լրագրողներ, մենք պարզաբանել ենք: Իմ տեղեկություններով՝ դատապարտյալների հիվանդանոցում, որ գտնվել է, տեղափոխվել Էրեբունի հիվանդանոց, հետո Էրեբունի հիվանդանոցում բուժօգնություն է կազմակերպվել, հետո նորից հետ է տարվել, կոնսիլիումներ՝ ընդգրկվել են մի քանի հիվանդանոցներից մասնագետներ եւ հանրապետության գլխավոր տրավմատոլոգը: Վերջին անգամ, իմ տեղեկություններով՝ հիվանդին տեսել են հինգշաբթի օրը: Ես հիմա հանձնարարություն կտամ մի քանի այլ մասնագետների, իրենք կգնան, դատապարտյալների հիվանդանոցում կնայեն, կոնսիլիում կկազմակերպեն: Եթե պետք է լաբորատոր, գործիքային հետազոտություն, համակարգչային տոմոգրաֆիա, ռենտգեն, ինչ որ պետք է՝ կանեն, բուժման տակտիկան կորոշեն՝ վիրահատություն է, բուժական մերսումներ են, բուժական վարժություններ են եւ այդ տակտիկայով կշարունակեն:
Առողջապահության նախարարությունը կհետեւի, որ այն կլինիկայում, որտեղ կկազմակերպվի բուժումը, հետագայում որպեսզի իր առողջության խնդիրներին հիմնավոր լուծումներ տրվեն, որպեսզի ձեզ մոտ որեւիցե մի կասկած չլինի, որ Հայաստանի Հանրապետության քաղաքացուն Հայաստանի Հանրապետությունը եւ առողջապահության նախարարությունը աջակցելու է»:
Կարդացեք նաև
Փոխնախարարը համաձայն է կոնսիլիումի մեջ ընդգրկել նաեւ Հովհաննես Հարությունյանի առաջարկած բժշկին: Նա նշեց, որ հենց այսօր բժիշկ կուղարկեն դատապարտյալների հիվանդանոց եւ ամենայն հավանականությամբ վաղը կոնսիլիումը կիրականացնեն:
«Ի պաշտպանություն Հովհաննես Հարությունյանի» քաղաքացիական նախաձեռնությունը այժմ առողջապահության նախարարությունից շարժվում է դեպի արդարադատության նախարարություն:
Ամի ՉԻՉԱԿՅԱՆ
