Երևանի քաղաքապետարանում տեղի ունեցած աշխատանքային հերթական խորհրդակցության ժամանակ, որը վարել է քաղաքապետ Տարոն Մարգարյանը, զեկուցվել է, որ նոյեմբերի 12-ին նախատեսված համաքաղաքային ծառատունկին և շաբաթօրյակին ընդառաջ արդեն իսկ ավարտվել են նախապատրաստական աշխատանքները: Նշվել է, որ մինչ այդ մայրաքաղաքի բակային տարածքներում շարունակվել են տեղային շաբաթօրյակները: Քաղաքապետ Տարոն Մարգարյանը բնապահպանության վարչությանը և վարչական շրջանների ղեկավարներին հանձնարարել է մեկ անգամ ևս ուսումնասիրել ծառատունկի համար նախատեսված տարածքները՝ առանձնակի ուշադրություն սևեռելով նաև բոլոր այն տարածքներին, որտեղ բազմաթիվ ծառեր էին վնասվել նախորդ շաբաթ տեղացած առատ ձյան հետևանքով:
«Մեկ-երկու օրվա ընթացքում գույքագրեք բոլոր այն տարածքները, որտեղ վնասվել են ծառերը, որպեսզի դրանք լրացնենք նոր տնկիներով: Ինչ վերաբերում է նոյեմբերի 12-ին նախատեսված համաքաղաքային ծառատունկին և շաբաթօրյակին, ապա հստակ աշխատանքներ տարեք, որպեսզի դրանց, ինչպես և նախորդող տարիներին, ակտիվորեն մասնակցեն նաև մեր համաքաղաքացիներն ու շահագրգիռ կազմակերպությունները: Նախապես բոլորին ապահովեք համապատասխան տնկիներով և անհրաժեշտ պարագաներով, նաև նշեք այն տարածքները, որտեղ առավել նպատակահարմար է ծառատունկի իրականացումը», – ընդգծել է Տարոն Մարգարյանը:
Երևանի քաղաքապետարանի մամլո հաղորդագրություն
Հարգելի քաղաքապետարան
Արդեն երկրորդ տարին է, որ չեն ոռոգվում Նոր Նորքի 7-րդ զանգվածում գտնվող Հայ-Կանադական այգու ծառերը: Երկու տարվաս ընթացքում չորացել են ծառերի մոտ 80%: Ես բազմաթիվ անգամ, գրել եմ Ձեզ, ներակայացրել եմ թաղապետարանին, բայց արդյունք չեղավ ու ծառերը շարունակեցին չորանալ: Ասում են ոռոգման համակարգ չկա ու վերջ՝ հարցը լփակված է: Այս տարի նույնիսկ այգեգործ են ընդունել, աշխատավարձ վճարել, բայց արդյունքը նույնն է, քանի որ կրկին ասում են ոռոգման համակարգհ չկա ու չեն ջրում, իսկ ծառերը շարունակում են չորանալ: Եթե ոռոգման համակարգ չկա, ապա ում է պետք այգեգործը:
Քանի որ քաղաքապետը նոյեմբերի 12-ը հայտարարել է ծառատունկի օր, ապա Ձեր ուշադրությունն եմ հրավիրում այս հիմնախնդրի վրա, քանի որ արդեն մյուս տարի տվյալ այգում բոլոր ծառերը կչորանան: Այգին ամառավա ու մյուս տաք օրերին բնակչության միակ հանգստյան վայրն է:
Կանխավ շնորհակալ եմ: