Aravot.am-ը այսօր ԱԺ-ում ՊԵԿ նորանշանակ նախագահ Վարդան Հարությունյանին հարցրեց՝ ԱԺ-ում պատգամավորները հայտարարում են, որ ինչ բերում են՝ սխտորի անվան տակ են ներկրում:
Նա պատասխանեց. «Ես խնդրում եմ՝ փաս-տա-ցի, փաս-տե-րով»:
Մեր դիտարկմանը, որ մասնավորապես, Նաիրա Զոհրաբյանն է նման հայտարարություն արել՝ Վարդան Հարությունյանն արձագանքեց. «Խնդրում եմ, տիկին Զոհրաբյանին ասեք՝ փաստ տա, հետազոտենք, գտնենք, պատժենք, թե ով է բերում»:
Հիշեցնենք, որ Նաիրա Զոհրաբյան ասել էր, որ Հայաստան արդեն այնքան սխտոր է ներկրվել, որ այդքան սխտորով հնարավոր կլիներ Չինաստանի ու Հնդկաստանի բնակչությանը միասին սխտորով ապահովել:
Կարդացեք նաև
Մեր հարցին՝ Դուք նման երեւույթների ականատես չե՞ք եղել՝ նա պատասխանեց. «Ես 20 օր եմ աշխատում: Խնդրում եմ, որ դուք օգնեք: Ասում եք սխտո՞ր կա, բերեք գտնենք»:
Մեր դիտարկմանը, որ այսպես ամբիցիոզ հայտարարություններ եք անում, որ կանոններ եմ դնելու՝ ՊԵԿ նախագահը միանգամից արձագանքեց. «Ամբիցիոզ հայտարարություն եմ անում ու ա-նե-լո՛ւ եմ»:
Մեր դիտարկմանը, որ ուրիշներին եք ասում փաստեր բերեն, բերող լինեին, մինչեւ այդ կբերեին՝ Վարդան Հարությունյանը պատասխանեց. «Ախր բա ի՞նչ եք ուզում»:
Լրագրողները հետաքրքրվեցին՝ ի՞նչը ստիպեց ձեզ տեղափոխվել բարձր աշխատավարձից ավելի ցածր աշխատավարձ ունեցող աշխատանքի: Նա պատասխանեց. «Վարչապետի պահանջը: Հերիք չի՞»: Դիտարկմանը՝ հանուն ինչի՞՝ նա պատասխանեց. «Հանուն սկզբունքի: Հանուն այն սկզբունքի, որը դրված է կառավարության ծրագրի հիմքում»:
Հռիփսիմե ՋԵԲԵՋՅԱՆ
