«Ի պաշտպանություն Հովհաննես Հարությունյանի» քաղաքացիական նախաձեռնությունը նոյեմբերի 7-ին հավաքվել էր Մարդու իրավունքների պաշտպանի գրասենյակի առաջ:
Նախաձեռնության անդամ Դավիթ Սանասարյանը հայտարարեց, որ իրենց պահանջներից է թույլատրել նախաձեռնության վստահած պատվիրակությանը տեսակցել Հովհաննես Հարությունյանին, նրան տեղափոխել քաղաքացիական հիվանդանոց հետազոտության, պատասխանել , թե ինչու չի իրականացվել վիրահատություն, վերացնել Հովհաննես Հարությունյանի խափանման միջոց կալանավորումը, որպեսզի ապահովվի Հովհաննես Հարությունյանի լիարժեք բուժումը:
Նախաձեռնությունը նաեւ պահանջում է առողջապահության նախարարից, արդարադատության նախարարից, Դատապարտյալների հիվանդանոց ՔԿՀ-ից, քրեակատարողական վարչությունից, ՄԻՊ-ից պարզաբանումներ ներկայացնել Հովհաննես Հարությունյանին պատշաճ բուժօգնություն տրամադրելու հարցում առաջացած ողջ խառնաշփոթի մասին:
Կարդացեք նաև
48 ժամվա ընթացքում տվյալ պահանջները չբավարարելու դեպքում պահանջելու են աշխատանքից ազատել Մարդու իրավունքների պաշտպանին, առողջապահության եւ արդարադատության նախարարներին, «Էրեբունի» բժշկական կենտրոնի տնօրենին, Քրեակատարողական վարչության եւ «Դատապարտյալների հիվանդանոց» ՔԿՀ-ի պետերին: Պահանջները չկատարելու դեպքում քաղաքացիական նախաձեռնությունը հարցը կմիջազգայնացնի:
ՄԻՊ գրասենյակում քաղաքացիներին հանդիպեց Մարդու իրավունքների պաշտպանի տեղակալ Արմեն Մաշինյանը: Նա լսելով քաղաքացիներին մտահոգող հարցերը, ասաց, որ այցելություններ «Դատապարտյալների հիվանդանոց» պարբերաբար եղել են եւ վերջին այցելությունը եղել է նոյեմբերի 5-ին. «Ինչ վերաբերում է բժշկական միջամտության անհրաժեշտություններին, այդ հարցը ի սկզբանե ՄԻՊ-ի ուշադրության կենտրոնում է եղել: Ավելին ասեմ՝ կա գրավոր բողոք փաստաբանի կողմից, որի ընթացակարգը, ի դեպ, այսօր առավոտյան պաշտպանը այդ հարցը կրկնակի է բարձրացրել, բարձրացնելով ինչպես վիրահատության անհրաժեշտության հարցի քննարկումը, այնպես էլ, ըստ փաստաբանի նշածի՝ օտարերկրյա բժիշկների կողմից բարձրացրած խնդիրները քննարկման առարկա դարձնելու եւ պարզաբանումներ ներկայացնելու հարցը: Այցելությունների ընթացքում վիճակի նման վատթարացում որպես այդպիսին չի եղել, ավելին՝ չի եղել պաշտպանի կողմից նման հայտարարություն, որ վիրահատության անհրաժեշտություն չկա»:
Ի պաշտպանություն Հովհաննես Հարությունյանի քաղաքացիական նախաձեռնությունը ՄԻՊ գրասենյակին հանձնեց իր նամակ-պահանջը եւ երթով շարժվեց դեպի առողջապահության նախարարություն: Այստեղից քաղաքացիները կշարժվեն արդարադատության նախարարություն եւ «Դատապարտյալների հիվանդանոց» ՔԿՀ:
Ամի ՉԻՉԱԿՅԱՆ
