«Հայաստանն ապացուցեց, եւ դա արդեն փաստ է, որ այստեղ կարող են ստեղծվել հավելյալ արժեքով նորարարական կոմպոնենտներ: Դա շատ կարեւոր է, դա մեր երկրի ներուժն է: Հայկական կազմակերպությունները երեւացին աշխարհի քարտեզի վրա: Եթե այցելեք «Սիլիկոնյան հովիտ», ոչ թե կհարցնեն, թե Հայաստանը որտեղ է, այլ կասեն՝ այդ ի՞նչ եք անում, որ ամբողջ աշխարհը ձեր մասին է խոսում»,-այսօր «Նովոստի Արմենիա» մամուլի կենտրոնում անդրադառնալով հարցին, թե կարո՞ղ է Հայաստանը տեղեկատվական տեխնոլոգիաների զարգացման շնորհիվ դառնալ «կովկասյան Սինգապուր», ասաց «Ձեռնարկությունների ինկուբատոր հիմնադրամի» տնօրեն Բագրատ Ենգիբարյանը:
«Որպեսզի դառնա, քիչ ավելի պետք է աշխատենք: Մեզ նկատել են, մեզ գնահատում են: Որպեսզի իրենց «բարի գալուստ» ասենք, պետք է համապատասխան միջավայրում մրցակցենք»,-նկատի ունենալով Վանաձորի տեխնոլոգիական կենտրոնի հնարավորությունները՝ հավելեց նա:
Բագրատ Ենգիբարյանի համոզմամբ, ՀՀ ղեկավարությունը ցանկացած միջազգային հանդիպման ժամանակ պետք է շեշտի, որ Հայաստանը տեխնոլոգիական նորարարությունների զարգացման ոլորտում ունի տարածաշրջանային հավակնություններ:
Հիշեցնենք՝ հոկտեմբերին կայացած Եվրասիական գործընկերության միջազգային համաժողովի ժամանակ ԱՄՆ-ից ժամանած քաղաքագետ Դմիտրի Ռոդնիչեւսկին կարծիք էր հայտնել, որ Հայաստանը կարող է դառնալ «կովկասյան Սինգապուր»:
Կարդացեք նաև
Լուիզա ՍՈՒՔԻԱՍՅԱՆ
