«Հովհաննեսի վիճակը նորմալ է»,- պատասխանելով լրագրողների հարցին, թե «Սասնա ծռեր» խմբավորման անդամ Հովհաննես Հարությունյանի ոտքի հետ կապված խնդիրներ են առաջացել. փաստաբանի պնդմամբ` Հովհաննեսի ոտքը սեւացել է եւ պետք է վիրահատվի, այսպես պատասխանեց «Էրեբունի» բուժկենտրոնի տնօրեն Միքայել Մանուկյանը:
Պարոն Մանուկյանը, որն այսօր մասնակցում էր Առողջապահական իրավունքի 1-ին «Առողջապահությունը եւ մարդու իրավունքները» խորագրով միջազգային համաժողովին, այլ մանրամասներ չներկայացրեց եւ այդպես էլ չասաց Հովհաննես Հարությունյանին վիրահատություն պետք է, թե՞ ոչ:
Հիշեցնենք, որ նոյեմբերի 4-ին, ի պաշտպանություն Հովհաննես Հարությունյանի ստեղծված նախաձեռնությունը մտահոգություն էր հայտնել, որ ՊՊԾ գնդի գրավման օրերին վիրավորված Հովհաննես Հարությունյանը խնդրում է բժիշկներին` վիրահատել իր անզգայացած ոտքը:
Լուսինե ԲՈՒԴԱՂՅԱՆ
