Նոր վարչապետի բարեփոխումներն արդյոք նախընտրական են: Ազգային ժողովի ՀՀԿ-ական պատգամավոր Սուքիաս Ավետիսյանն ասաց` ինչ լավ բան անում են, ասում են` նախընտրական է կամ հետընտրական:
Այսօր «Հայելի» ակումբում պարոն Ավետիսյանը եւ ԱԺ պատգամավոր Լյովա Խաչատրյանը արձագանքեցին վարչապետի եւ ՀՀ նախագահի նոր հանձնարարականներին համաձայն որոնց, արագաչափերի եւ «կարմիր գծերի» բիզնեսը մասնավորից կանցնի պետության տնօրինմանը:
Լյովա Խաչատրյանը գտնում է, որ տեսախցիկները եւ «կարմիր գծերը» «քվոտավորված ռեկետ» են. «Շատ երկրներում, իհարկե, կան կայանատեղեր, արագաչափեր, բայց դրանց գումարը գնում է պետական ֆոնդ եւ ծառայում է ժողովրդին»: Նրա համոզմամբ, դրանք պետականացնելու որոշումը ճիշտ էր:
Կարդացեք նաև
Մեր այն հարցին, թե մասնավորից բիզնեսը վերցնելն արդյոք չի դիտվի անօրինական քայլ, պարոն Խաչատրյանն ասաց, որ դասական իմաստով ինքը դրանք բիզնես չի համարում. «Դա բիզնես չէ, քվոտավորված փող աշխատելու տեղ է պարզապես, բիզնեսն այն է, որ մրցակցություն կա, երբ որոշակի մրցակցություն կա: Կարմիր գիծը քաշում ես, օրական մի քանի միլիոն փող ես առնում, այստեղ ի՞նչ բիզնես, ի՞նչ ռիսկ»:
Սուքիաս Ավետիսյանը սակայն, այդ կարծիքին չէ, նա գտնում է, որ տեսախցիկներն ու «կարմիր գծերը» մայրաքաղաքի երթեւեկությունը կանոնակարգել են: Ինչ վերաբերում է բիզնեսը մասնավորից վերցնելուն, ապա պարոն Ավետիսյանը կարծում է, որ պետությունը չի թողնի որ ներդրողը տուժի. «Նախագահի հանձնարարականն այնպիսին էր, որ առանց սեփականատիրոջ իրավունքները ոտնահարելու՝ փորձենք գտնել լուծումներ: Կարելի է շատ հստակ հաշվարկել որքան գումար են ներդրել, եւ հաշվարկները կատարելուց հետո կարելի է շատ հստակ լուծումները գտնել»:
Պարոն Ավետիսյանն անդրադառնալով գազի գնի նվազմանն, ասաց, որ այդ որոշումն անհրաժեշտություն էր, քանի որ Հայաստանը համարվում է աշխարհում ամենագազիֆիկացված երկիրը, բայց գազի սպառման ծավալներով քիչ է. «Գյուղեր կան, որ ամբողջությամբ գազիֆիկացված են, բայց գյուղի 10 տոկոսն է գազ օգտագործում, որովհետեւ թանկ է»:
Ըստ Սուքիաս Ավետիսյանի, մեր ապրանքը դրսում մրցունակ չէ, ոչ այնքան որակի պատճառով, այլ` գնի. Իսկ գինը գոյանում է թանկ էներգակիրներից:
Լյովա Խաչատրյանի համոզմամբ, մեր երկրում ցանկացած խնդրի լուծման համար ընդամենը քաղաքական կամք է պետք եւ, եթե այն լինի, խնդիրների լուծումը շարունակական է լինելու:
Լուսինե ԲՈՒԴԱՂՅԱՆ
