Aravot.am-ի հետ զրույցում ԱԺ փոխնախագահ Էդուարդ Շարմազանովը մեկնաբանեց ՌԴ արտգործնախարարության պաշտոնական ներկայացուցիչ Մարիա Զախարովայի հայտարարությունը, որը վերաբերում է Ադրբեջանի նախագահի՝ Արցախի կարգավիճակի մասին ասվածին: Հիշեցնենք՝ Ալիեւը նշել էր, որ «միակ փոխզիջումը Լեռնային Ղարաբաղին ինքնավար մարզի կարգավիճակ շնորհելն է»:
Զախարովան էլ օրերս այսպես է մեկնաբանել. «Կողմերը պետք է համաձայնության գան: Ուժային ոչ մի գործողություն չի կարող նպաստել Լեռնային Ղարաբաղի հակամարտության խաղաղ կարգավորմանը: «Այո, կողմերը պետք է համաձայնության գան, եւ Ադրբեջանը պետք է համաձայնի Արցախի անկախությանը»,-ասաց Էդուարդ Շարմազանովը:
Մեր դիտարկմանը, «գուցե Զախարովան նկատի ունի, որ Ալիեւի առաջարկի շո՞ւրջ պետք է կողմերը համաձայնության գան», Էդուարդ Շարմազանովը հակադարձեց. «Ոչ: Հայկական կողմերը բանակցային սեղանին եւ դրանից դուրս հստակ ասել են՝ ԼՂՀ-ն որեւէ կարգավիճակով չի կարող լինել Ադրբեջանի կազմում: ԼՂՀ ժողովուրդը պետք է ունենա ամբողջական իրավունք՝ հանրաքվեով իրացնել իր ինքնորոշման իրավունքը՝ ընդհուպ մինչեւ լիակատար անկախություն»:
Լուիզա ՍՈՒՔԻԱՍՅԱՆ
Կարդացեք նաև
