«Նոր ժամանակներ» կուսակցության նախագահ Արամ Կարապետյանը տպավորություն ունի, որ իշխանություններն անցել են ցինիկության սահմանը:
Նա այսօր «Բլից ինֆո» ակումբում խոսեց՝ «կարմիր գծերի պետականացման», օդանավակայանի ծառայությունների գների նվազման թեմաների շուրջ:
«Այս գործընթացներից չկա գեթ մեկը, որը հնարավոր չլիներ ավելի վաղ սկսել: Տուգանքներ, կարմիր գծեր, օդանավակայանի գներ…այս հարցերի չլուծելը որեւէ բացատրություն չունի, բացի բնակչությունից փող կլպելը, որեւէ այլ փաստարկված բացատրություն չկա:
Հետաքրքիր է՝ կարմիր գծերն ինչու մեր կառավարությունը չի արել, այսինքն, կարմիր նե՞րկ չի ունեցել, Հայաստանում կարմիր ներկը խնդի՞ր է կամ այդքան փո՞ղ չի ունեցել, որ արագաչափեր գնի, ինչու է ներառել մասնավորին: Աշխարհի որ երկրում է պետական տուրքը կամ տուգանքը կիսվում մասնավորի ու արտաբյուջետային ֆոնդի մեջ: Տույժերն ու մնացածը գնում են բյուջե, մասնավորին փոխհատուցում են անում, այսինքն՝ այն, ինչ հիմա ուզում են անել: Սա, իհարկե, ընտրություններից առաջ նախապատրաստական աշխատանքներ են, ու իրենք չեն թաքցնում:
Կարդացեք նաև
Երկրորդ խնդիրը՝ բյուջեի մուտքերն են, բյուջեի մուտքերը կատաստրոֆիկ ընկնում են, իսկ մուտքերը չափավորելու դեպքում խնդիր է առաջանում արտաքին պարտքի սպասարկման հետ կապված: Հիմա Սերժ Սարգսյանը նույնիսկ իր ընտանեկան բիզնեսի վրա գնալով, որովհետեւ այլ տեղից քերթել ու ապահովել բյուջետային մուտքերը համարյա թե անհնար է, փորձում է ապահովել»,- ասուլիսին ասաց պարոն Կարապետյանը:
Անդրադառնալով կառավարության ծրագրին՝ պարոն Կարապետյանը նկատեց. «Իմ տպավորությամբ, կառավարության ծրագրի 99 տոկոսը նախորդի copy past-ն է, նշվում է՝ ՌԴ հետ դաշնակցային փոխհարաբերության եւ համագործակցության խորացում, այսինքն` էլ տեղ կա՞ խորացման, այս մասը ճիշտ կլիներ 2008, 2009-ին, կառավարության ծրագրում մնացած բոլոր հարցերը, այդ թվում՝ նաեւ կոռուպցիայի դեմ պայքարը, copy past են»:
Արփինե ՍԻՄՈՆՅԱՆ
